[A:༧༦ན]གཤེགས། འདི་ལ་སློབ་མ་དགེ་བཤེས་འགར་ལ་སོགས་པ་བུ་བཞི་དང་། ཚེ་བློས་ཐོངས་པ་བཅུ་བཞི་ལ་སོགས་པ་བྱོན་ཏེ་འདིར་མ་སྤྲོས་སོ། །དེའི་སློབ་མ་རིན་པོ་ཆེ་གླང་ལུང་པ། འཁྲུངས་ཡུལ་སྟོད་ལུང་ཚུར་བུ། ཡབ་རྡོ་རྗེ་གྲགས་ཀྱི་སྲས་སུ་ཡོས་ལོ་ལ་འཁྲུངས། ལོ་བཅུ་དགུ་ལ། པ་ཚབ་ལོ་ཙཱ་བ་ལས་རབ་ཏུ་བྱུང་སྟེ། མཚན་བརྩོན་འགྲུས་གཞོན་ནུར་བཏགས། ཟུར་ཆོས་པ་གཅིག་ལ་འདུལ་བ་མཁས་པར་བསླབ། ཉ་ག་མོ་བ་ལ་ལོ་བདུན་ལམ་རིམ་ཁྲིད་ཚར་གཅིག་བསྐྱངས་པས། ཇི་ལྟར་འདོད་པ་བཞིན་བློ་བཀོལ་དུ་བཏུབ་པ་བྱུང་གསུངས། ཉེར་བདུན་ལ་སྣོན་གྱི་གྱད་པར་བྱ་འདུལ་འཛིན། ཆ་པ་ཆོས་སེང་། བཙུན་པ་ཆོས་མཆོག་གསུམ་ལ་བསྙེན་པར་རྫོགས། དེ་ནས་ལོར་གཙང་པ་རིན་པོ་ཆེ་ལོ་ལྔ་བསྟེན། ཆོས་མང་དུ་གསན། དད་གུས་ཚད་མེད་པ་འཁྲུངས་པས་རྟོགས་པ་བཟང་པོ་མང་དུ་འཁྲུངས་ལ། སྔོན་དུ་ལོའི་གདན་ས་ལོ་བཅུ་གཉིས་དང་། དེ་ནས་ལོ་བྱ་ཡུལ་སྦྲེལ་ནས་ལོ་དྲུག་སྟེ་བཅོ་བརྒྱད་མཛད། བདུན་ཅུ་རྩ་ལྔ་པ་ལ་བྱ་ཡུལ་དུ་གཤེགས། གླང་ལུང་པའི་དུས་སུ་ཆོས་རྗེ་འཇིག་རྟེན་མགོན་པོ་བྱ་ཡུལ་དུ་བྱོན་ཏེ། ཁྲོམ་ཤེར་དང་གཉིས་ལ་བཀའ་གདམས་ཀྱི་ཆོས་གསན་པའི་དུས་སུ། དེ་གཉིས་ཀྱི་སློབ་མ་སྐྱོ་རིན་པོ་ཆེ་ལ་ངེད་དབེན་གནས་བྱོན་པའི་ས་ཅིག་དགོས་གསུངས་པས། གཞོའི་ཕུ་ན་འབྲི་ཕྱུགས་འཇོག་པའི་སེ་ནགས་ཡོད་པ་ཕུལ། དགོན་པ་བཏབ་ཏེ་འཕྲིན་ལས་རྒྱས་པའི་ཚུལ་གཞན་དུ་གསལ་ལོ། །གླང་ལུང་པའི་རྗེས་སུ་སེ་རྣལ་