[A:༧༦བ]འབྱོར་པ་བསོད་ནམས་རྒྱལ་མཚན་འཁྲུངས་ཡུལ་གཞུང་། ཡབ་སེ་ཤེས་རྡོར་ཀྱི་སྲས་སུ་འཁྲུངས། གླང་ལུང་པའི་ཕྱག་ཕྱིར་ཡུན་རིང་བཞུགས། བླ་མཆོད་པ་ལོ་འགའ་དང་། ལོ་བྱ་ཡུལ་གྱི་གདན་ས་ལོ་དགུ་མཛད་ནས། གྲོག་གི་དབྱེ་ཕུ་དགོན་པ་བཏབ་པའོ། །སངས་རྒྱས་སྒོམ་པ་ནི། འཁྲུངས་ཡུལ་གཞུང་། ཡབ་འབེ་སྤྱན་རས་གཟིགས་ཀྱི་སྲས་སུ་འབྲུག་ལོ་ལ་འཁྲུངས། ལོ་བཅུ་བཞི་ལ་འདུལ་བ་འཛིན་པ་སྦལ་ཏིའི་སར་རབ་ཏུ་བྱུང་། མཚན་རྡོ་རྗེ་གཞོན་ནུར་བཏགས། དེ་ནས་ལོ་བཅོ་བརྒྱད་ལ་གླང་ལུང་པ་སྟོད་ལུང་དུ་བྱོན་པ་དང་མཇལ། ལོ་བཅུ་བཞི་བསྟེན། རྟོགས་པ་ཁྱད་པར་ཅན་འཁྲུངས། དེ་ནས་ལ་མོ་ལྷ་ཁང་དུ་ལོ་དྲུག་སྐུ་མཚམས་མཛད། སོ་བརྒྱད་ལ་ར་མོ་ཆེར་མཁན་པོ་སྦལ་ཏི་ལ་བསྙེན་རྫོགས་ཞུས། འདུལ་བ་མཁས་པར་བསླབས། ལོར་བྱོན་ནས་ཞེ་བཞི་ལ་ལོ་བྱ་ཡུལ་གྱི་གདན་སར་བྱོན། གླང་ལོ་བར་བདུན་ཅུ་བཞུགས། ཟླ་བ་བཞི་པའི་ཚེས་བཞི་ལ་ལོར་གཤེགས། དེ་ནས་གཙང་པ་ཇོ་སྲས་ཀྱི་ལོ་དགུ་མཛད། ལོའི་དབུ་རྩེ་གསར་མ་བཞེངས། ཟེམ་རིན་པོ་ཆེ་ནི། ཡུལ་ཧ་མ་མདོའི་དེའུ་གོང་བྱ་བ། ཕག་ལོ་ལ་ཡབ་པ་ཡག་རྩེ་མོའི་བུར་འཁྲུངས། ལོ་བཅུ་བདུན་ལ་ལོར་སངས་རྒྱས་སྒོམ་པའི་སྤྱན་སྔར་བྱོན་པས། སྔོན་ལ་གྲོ་སར་སོང་གསུངས་ནས་རྣལ་འབྱོར་བྱང་སེང་ལ་རབ་བྱུང་ཞུས། མཚན་གྲགས་པ་སེང་གེར་བཏགས། འདུལ་བ་དང་། ཇོ་བོ་ནས་བརྒྱུད་པའི་ཆོས་མང་དུ་གསན། ལོ་ལྔ་བཞུགས། ཡར་ལམ་རིན་ཆེན་སྒང་དུ་སངས་རྒྱས་དབོན་ལ་ཆོས་ཞུས། དེ་ནས་ཧ་མ་མདོར་ལོ་བཞི་སྒྲུབ་