[A:༧༩ན]དང་ལྡན་པ་ཡིན་གསུངས། བྱ་ཡུལ་གྱི་མཁན་པོ་ལོ་གསུམ། ལམ་དགོན་གྱི་གདན་ས་ལོ་བརྒྱད། གདན་ས་ཆེ་བ་ལོ་ཉི་ཤུ་རྩ་གཉིས་མཛད་དེ། བདུན་ཅུ་རྩ་གཅིག་པ་གླང་ལོ་ཟླ་བ་དགུ་པའི་ཚེས་བཅུ་བཞི་ལ་ལོར་གཤེགས། སྟོད་ལུང་པ་རིན་ཆེན་སྙིང་པོའི་སྤྲུལ་པར་གྲགས་སོ། །རིན་པོ་ཆེ་གནམ་གང་པ་འཁྲུངས་ཡུལ་འོལ་ཁ། གདུང་རུས་བྱེན། ཡབ་ཆོས་སྐྱོང་བསམ་མེའི་སྲས་སུ་ཁྱི་ལོ་ལ་འཁྲུངས། ལོ་བཅུ་གཅིག་ལ་རྒྱས་སྟེང་དུ་སངས་རྒྱས་དབོན་པོ་ལ་རབ་ཏུ་བྱུང་། མཚན་གཞོན་ནུ་ཡེ་ཤེས་སུ་བཏགས། མཁན་ཆེན་ཆ་རུ་བ་ལ་འདུལ་བ། སྤྱོད་འཇུག གདམས་ངག་སྐོར་མང་དུ་གསན། བཅུ་དགུ་ལ་རིན་པོ་ཆེ་ཚུལ་ཁྲིམས་མགོན་པོ་ལ་བསྙེན་རྫོགས་ཞུས། ངེད་ཀྱི་གཟིམས་གཡོག་བགྱིས། ཟིན་བྲིས་ཐོབ་གསུངས་པས་དེ་ལྟར་མཛད་དེ། ཚོགས་ལྐོག་གི་ཆོས་རྫོགས་པར་གསན་པས། ཐུགས་རབ་ལ་མཉེས་ཏེ་བློ་གྲོས་རྣམས་དག་ཅེས་གསུངས། ལོ་ཉེར་དྲུག་ལ་རྒྱས་སྟེངས་སུ་བསྐོས་བཅོ་ལྔ་མཛད། དེ་ནས་རིན་པོ་ཆེ་བཅུ་བཞི་པས། ཐུབ་པའི་གསེར་སྐུ། དབུ་ཞྭ། སྟན་རིམ་སོགས་གནང་ནས་བྱིན་གྱིས་བརླབས། བཞི་བཅུ་ལ་གདན་སར་བྱོན་ལོ་སོ་བཞི་མཛད། དོན་གསུམ་པ་ཁྱི་ལོ་ཟླ་བ་གཉིས་པའི་གནམ་གང་བར་དུ་བཞུགས། རིན་པོ་ཆེ་ཚེས་བཅུ་པ་འཁྲུངས་ཡུལ་འོལ་ཁ་གདུང་རུས་ལྗང་། ཡབ་དཔོན་དཀར་གྱི་སྲས་སུ་འབྲུག་ལོ་ལ་འཁྲུངས། ལོ་བཅུ་བཞི་ལ་རིན་པོ་ཆེ་བཅུ་བཞི་པ་རབ་བྱུང་ཞུས། མཚན་ཆོས་ཀྱི་རྡོ་རྗེར་བཏགས། ཉེར་གཅིག་ལ་བྱ་ཡུལ་དུ་རིན་པོ་ཆེ་དེ་ཉིད་ཀྱི་དྲུང་དུ་བསྙེན་རྫོགས་