[A:༨༠ན]འཁྲུངས། དགུང་ལོ་བཅུ་གསུམ་ལ་གུགས་རྫོང་དུ་སློབ་དཔོན་ཚུལ་རྒྱལ་བ་ལ་རབ་ཏུ་བྱུང་། མཚན་ཚུལ་ཁྲིམས་དར་དུ་བཏགས། ཉི་ཤུ་རྩ་ལྔ་ལ་རིན་པོ་ཆེ་ཆོས་ཀྱི་རྡོ་རྗེའི་དྲུང་དུ་བསྙེན་རྫོགས། སྐྱོར་མོ་ལུང་དུ་སློབ་དཔོན་བསམ་གཏན་དོན་གྲུབ་དང་། གྲོ་སར་མར་སྟོན་དབུ་མ་པ་སོགས་ལ་འདུལ་བའི་སྡེ་སྣོད་མཐའ་དག་ལ་མཁས་པར་སྦྱངས། མཁན་ཆེན་སངས་རྒྱས་དཔལ་བ་དང་། ཆོས་རྗེ་ཐམས་ཅད་མཁྱེན་པ་སོགས་ལས། ཤེར་ཕྱོགས་བྱམས་ཆོས་མཐའ་དག་ཐུགས་སུ་ཆུད་པར་མཛད། ཐང་སག་ཏུ་ཟླ་གྲགས་གསར་མ་དང་། སློབ་དཔོན་ཚུལ་དཔལ་བ་ལ་དབུ་མའི་གཞུང་ཆེ་ཆུང་མཐའ་དག་གསན། རིན་པོ་ཆེ་རིན་ཆེན་རྒྱལ་མཚན་སོགས་བླ་མ་ལྔའི་དྲུང་དུ་བཀའ་གདམས་ཀྱི་ཆོས་སྐོར་རྣམས་དང་། ཆོས་རྗེ་ཀུན་བཀྲས་པ་སོགས་ལ་ས་ལུགས་ཀྱི་ཆོས་སྐོར་དང་། ཞ་ལུ་གྲགས་པ་རྒྱལ་མཚན་པ་ལ་བུ་ལུགས་ཀྱི་ཆོས་བསྐོར་དང་། གདན་ས་ཐེལ་དུ་ཆོས་རྗེ་བསོད་ནམས་རྒྱལ་མཚན་པ་ལ་ཕྱག་རྒྱ་བའི་ཆོས་བསྐོར་དང་། རྟོགས་ལྡན་སྔོ་ཉལ་མ་དང་། དྲུང་རིན་རྒྱལ་བ་ལ་དུས་འཁོར་རྒྱུད་འགྲེལ་སོགས་ལ་མཁས་པར་མཛད། མདོར་ན་མཁས་གྲུབ་ཀྱི་བླ་མ་སུམ་ཅུ་ཙམ་བསྟེན་ཏེ། བདེ་བར་གཤེགས་པའི་གསུང་རབ་མཐའ་དག་གི་ཚིག་དོན་ལ་མངའ་བརྙེས་པར་མཛད་དེ། མཁས་པའི་གྲགས་པས་ཕྱོགས་ཀུན་ཁྱབ། འཆད་ཉན་སོགས་གཞན་ཕན་རྒྱ་ཆེར་མཛད་དེ། སློབ་མའི་མཆོག ཆོས་རྗེ་དགེ་བ་རྒྱལ་མཚན། ཟད་པ་བློ་རྒྱམ། ཟད་པ་པདྨ་བཟང་པོ། ཆོས་རྗེ་བློ་བརྟན་པ། ཁམས་སུ་ལྷ་འབྲི་