[A:༨༠བ]སྟོན་པ་སོགས་མང་དུ་བྱོན། ཤེར་ཕྱོགས་གསུངས་བའི་ཚེ་མེ་ཏོག་གི་ཆར་འབབ་པ། ཡི་དམ་དང་ཆོས་སྐྱོང་ཞལ་གཟིགས་པ་སོགས་རྒྱས་པར་རྣམ་ཐར་དུ་གསལ་ལ། ལོར་བྱེས་པ་མཁན་པོ་ལོ་ལྔ། གཟིམ་འོག་ལོ་གསུམ། གདན་ས་གོང་ལོ་བཅུ་བདུན་མཛད། བདུན་ཅུ་དོན་ལྔ་པ་འབྲུག་ལོ་ཟླ་བ་བཅུ་གཅིག་པའི་ཉེར་དྲུག་བར་དུ་བཞུགས། རྗེ་བསོད་ནམས་ལྷའི་དབང་པོ་ནི། བྱམས་མགོན་གཉིས་པ་རིན་པོ་ཆེ་ཚུལ་ཁྲིམས་དར་ལས་བསྙེན་རྫོགས་མཛད་དེ། བཀའ་གདམས་ཀྱི་ཆོས་བསྐོར་ཕལ་ཆེར་གསན། རོང་སྟོན་ཐམས་ཅད་མཁྱེན་པ། བྱང་ར་སྒྲེང་པ་སེམས་དཔའ་ཆེན་པོ་ཤཱཀྱ་བསོད་ནམས། ར་སྒྲེང་པ་རིན་ཆེན་གྲགས་པ། ཆོས་རྗེ་ཀུན་དགའ་རྒྱལ་མཚན་པ། དྭགས་པོ་འཇམ་དབྱངས་བཀྲ་ཤིས་རྣམ་རྒྱལ། དུས་ཞབས་དོན་གྲུབ་ཀུན་དགའ། བཀའ་འགྱུར་བ་ཤཱཀྱ་རྒྱལ་མཚན་སོགས་ཡོངས་འཛིན་མང་དུ་བསྟེན་ནས་མདོ་སྔགས་རབ་འབྱམས་ཀྱི་དབང་ལུང་ཁྲིད་མན་ངག་སོགས་ཀྱི་གསན་པ་དཔྱིས་ཕྱིན་པར་མཛད་ཅིང་། དཔལ་ལོ་དགོན་པའི་སྤྱན་སྔ་ལོ་མང་དུ་མཛད། དགུང་ལོ་དོན་དྲུག་གི་བར་དུ་སྤྱིར་བསྟན་པ་དང་། ཁྱད་པར་བཀའ་གདམས་ཀྱི་བསྟན་པ་ཆེས་ཆེར་གསལ་བར་མཛད་ཅིང་བཞུགས་སོ། །སྤྱན་སྔ་ངག་དབང་ཆོས་ཀྱི་གྲགས་པ་ནི། ཡབ་སྟོང་དཔོན་འཕགས་པ་དཔལ་དང་། ཡུམ་སྤྱོད་ཡུལ་མཚོ་གཉིས་ཀྱི་སྲས་སུ་ལྕགས་མོ་གླང་གི་ལོ་སྐུ་བལྟམས། བསོད་ནམས་ལྷའི་དབང་པོ་ལས་རབ་ཏུ་བྱུང་། མཚན་ངག་དབང་ཆོས་གྲགས་རྒྱལ་མཚན་དཔལ་བཟང་པོར་བཏགས། འཇམ་