[A:༨༡ན]དབྱངས་ཀུན་དགའ་ཆོས་བཟང་ལས་བསྙེན་པར་རྫོགས། མཁན་པོ་དེ་ཉིད་དང་། ཆོས་རྗེ་བློ་གྲོས་རྒྱལ་མཚན། རྗེ་མཁྱེན་རབ་རིན་ཆེན་མཆོག་གྲུབ། སྙུག་ལ་པཎ་ཆེན་ངག་དབང་གྲགས་པ། སྔགས་འཆང་རིན་ཆེན་རྣམ་རྒྱལ། མུས་ཆེན་སངས་རྒྱས་རིན་ཆེན། ས་ལོ་ཐམས་ཅད་མཁྱེན་པ། རྗེ་བྱམས་པ་ཆོས་ཀྱི་ཉི་མ། བདག་ཆེན་ངག་གི་དབང་ཕྱུག་སོགས་བླ་མ་མང་དུ་བསྟེན་ནས་མདོ་སྔགས་རིག་གནས་ཀྱི་བསྡུས་པའི་ཆོས་ཚུལ་རྒྱ་མཚོ་ལྟ་བུའི་ཕ་མཐར་གསོན། ཐུགས་དམ་ལ་གཅིག་ཏུ་གཞོལ་བས་ཉམས་དང་རྟོགས་པའི་དབང་ཕྱུག་ཏུ་གྱུར། སྙིགས་དུས་ཀྱི་བསྟན་པའི་གསལ་བྱེད་ཆེན་པོ་སྔགས་འཆང་ཆོས་ཀྱི་རྒྱལ་པོ་ངག་དབང་ཀུན་དགའ་རིན་ཆེན་ཡབ་སྲས་སྐུ་མཆེད་སོགས་ཀྱི་བཀའ་གདམས་ཀྱི་ཆོས་བུམ་པ་གང་བྱོར་གསན་པའི་བླ་མར་བསྟེན། ལོ་བྱ་ཡུལ་སོགས་བཀའ་གདམས་ཀྱི་དགོན་གནས་རྣམས་ཀྱི་གདན་ས་སྐུ་ཚེ་རིལ་པོར་མཛད། སྤྱི་དང་བྱེ་བྲག་གི་བསྟན་པ་ཡར་ངོའི་ཟླ་བ་ལྟར་རྒྱས་པར་མཛད་དེ། དགུང་ལོ་བརྒྱད་ཅུ་རྩ་དགུ་པ་སྦྲུལ་ལོ་སྨིན་དྲུག་ཟླ་བའི་ཉེར་ལྔའི་ཉིན་བདེ་བར་གཤེགས་སོ། །དེ་ལྟ་བུའི་སྐྱེས་ཆེན་དམ་པ་དེ་ཉིད་ཀྱི་སྐུའི་རྣམ་པར་སྤྲུལ་པ་བདག་གི་བླ་མ་སྤྱན་སྔ་རིན་པོ་ཆེ་བྱམས་པ་ཀུན་དགའི་མཚན་ཅན་འདི་ཉིད་ནི། ལུག་ལོ་བཀྲ་ཤིས་པའི་དགེ་མཚན་དང་བཅས་ནས་སྐུ་འཁྲུངས། མཁས་གྲུབ་ཀྱི་བླ་མ་དུ་མ་ལས་གསན་པ་རྒྱ་མཚོའི་ཕ་རོལ་དུ་གསོན་ཏེ། ལུང་དང་རྟོགས་པའི་ཡོན་ཏན་བསམ་གྱི་མི་ཁྱབ་པའི་མངའ་བདག་ཏུ་གྱུར། ལོ་དང་བྱ་ཡུལ་སོགས་བཀའ་