[A:༨༠ན]དངོས་སློབ་པཎ་ཆེན་ནམ་མཁའ་དབང་ཕྱུག་དང་། འཇམ་དབྱངས་དཀོན་མཆོག་རྒྱ་མཚོ་སོགས་ཀྱི་དྲུང་དུ་བཀའ་གདམས་ཐིག་ལེ་བཅུ་དྲུག་གི་དབང་ཁྲིད། གཞུང་དྲུག་གི་ལུང་། ཆོས་ཆུང་བརྒྱ་རྩ། ལྷ་བཞིའི་ཁྲིད། རིན་སྤུང་བསྐོར་གསུམ། བཀའ་གདམས་གླེགས་བམ་ཡོངས་རྫོགས། བློ་སྦྱོང་གི་སྐོར་སོགས་མཐའ་ཆོད་པར་གསན་ཞིང་། དེ་ལྟར་འཇམ་པའི་དབྱངས་སྐུ་མཆེད་དང་། རྒྱལ་བ་མུས་པ་ཆེན་པོ་སངས་རྒྱས་རྒྱལ་མཚན། སྤྱན་སྔ་ཀུན་དགའ་དོན་གྲུབ། མཁན་ཆེན་འཇམ་པའི་དབྱངས་ངག་དབང་ཆོས་གྲགས། གཞན་ཡང་བརྒྱུད་ལྡན་གྱི་བླ་མ་ཡིད་ཆེས་ཅན་དུ་མའི་དྲུང་དུ་ས་སྐྱ་པ་སྔགས་འཆང་ངག་དབང་ཀུན་དགའ་བསོད་ནམས་གྲགས་པ་རྒྱལ་མཚན་དཔལ་བཟང་པོ་བདག་གིས་དགེ་བའི་བཤེས་གཉེན་བཀའ་གདམས་པ་ནས་བརྒྱུད་པའི་ཆོས་སྐོར་རྣམས་དྭང་འདོད་ཡིད་ཆེས་ཀྱི་དད་པ་བླ་ན་མེད་པའི་སྒོ་ནས་འབད་རྩོལ་ཆེན་པོས་རྫོགས་པར་མནོས་ཤིང་། ལྷག་པར་སྔོན་ཇོ་བོ་ཆེན་པོ་དཔལ་ལྡན་ཨ་ཏི་ཤས་འབྲོམ་སྟོན་པ་ལ་ཐུགས་ཀྱི་སྲས་གཅིག་པུ་ལྟ་བུར་མཛད་པ་ལྟར་དུས་གསུམ་སྒྲིབ་མེད་དུ་གཟིགས་པའི་རྗེ་བཙུན་མུས་པ་ཆེན་པོ་དེ་ཉིད་ཀྱིས་ཁོ་བོ་ཅག་ལ་ཐུགས་རྗེའི་སྤྱན་རས་ཀྱི་བུ་གཅིག་པ་ལྟར་འཚོ་བར་མཛད་པའི་སྐལ་བ་མཆོག་ཀྱང་ཐོབ་པ་ལགས། གོང་དུ་སྨོས་པའི་སྟོད་ལུང་པའི་སློབ་མ་ལ་གྲགས་ཆེ་བ་སྡིངས་བུ་བ། ཀློག་སྐྱ། དགེ་བཤེས་ཟར་པ། དགེ་བཤེས་ལྷ་བཟོ་བ། ཁྱུང་ཁམས། བྱ་འདུལ་འཛིན་དང་དྲུག་ལས། སྟོད་ལུང་པའི་དགོངས་པ་ལོན་པ་ཕྱི་མ་གསུམ་