[A:༨༩བ]གྱིས་ཀྱང་གནས་ངེས་མེད་དུ་བཞུགས་ནས་ཉམས་ལེན་མཛད་དོ། །དེ་ནས་སྤྱན་རས་གཟིགས་ཀྱི་སྤྲུལ་པ་ཕུ་ཆུང་པ་གཞོན་ནུ་རྒྱལ་མཚན་ལ་གནང་། དེས་ཀ་མ་བ་རྣལ་འབྱོར་པ་རིན་ཆེན་རྒྱལ་མཚན་ལ། དེས་སྟབས་ཁ་བ་ཞང་སྟོན་དར་མ་རྒྱལ་མཚན་ལ། དེས་ལྷ་བླ་མ་ཡེ་ཤེས་འོད་ཀྱི་སྐུ་སྐྱེ་བྱང་ཆུབ་བཟང་པོ་ལ། དེས་ནམ་མཁའ་རིན་ཆེན་ལ་གནང་། དེ་དག་གི་ལོ་རྒྱུས་རྒྱས་པར་དོན་དུ་གཉེར་ན། གླེགས་བམ་གྱི་བྱུང་ཚུལ་ངོ་མཚར་རྨད་དུ་བྱུང་བའི་དཔལ་འབྱོར་ཞེས་པར་བལྟའོ། །ཞར་ལ་ཁུ་སྟོན་བརྩོན་འགྲུས་གཡུང་དྲུང་གི་ལོ་རྒྱུས་ནི། ཡར་ལུང་ཐང་པོ་ཆེ་དང་ལྷ་སྡིངས་སུ་བྱོན། སྤྱིར་ཇོ་བོའི་ཆོས་མང་དུ་མངའ། ཁྱད་པར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྩལ་ཐོན། གཤིན་རྗེ་གཤེད་ཀྱི་ཞལ་གཟིགས། སློབ་མའི་མཆོག་མངོན་པ་ལ་མཁས་པ་བྲང་ཏི་དར་མ་སྙིང་པོ་སོགས་དང་། གླེགས་བམ་ལས། ན་ག་རཱ་ཛ་ལ་སོགས་པའི་འཁོར་ལྔ་བརྒྱ་ཙམ་ཡོད་ཅེས་འབྱུང་ངོ་། །གསུམ་པ་ནག་ཚོའི་རྗེས་སློབ་བྱོན་ཚུལ་ནི། ནག་ཚོ་ལོ་ཙཱ་བ་ལ། མངའ་རིས་སྐོར་གསུམ་དུ་སློབ་མ་མང་དུ་བྱོན་པ་ལ། དབུས་སུ་གྲགས་ཆེ་བ་རོང་པ་ཕྱག་སོར་བ་ཡིན་ཏེ། ཁོང་རང་གི་སྐྱེ་བ་བཅུ་གསུམ་དྲན་ཅིང་། མངོན་པར་ཤེས་པ་རྒྱ་ཆེན་པོ་མངའ་བ། སྒོམ་པའི་སྟོབས་ཀྱིས་རིག་པའི་གནས་ལ་མཁས་པ་དང་། དང་པོར་ཇོ་བོ་ཆེན་པོའི་གདམས་ངག་ཁོ་ན་རྩད་གཅོད་པ་ལ་ཇོ་བོའི་དངོས་ཀྱི་སློབ་མ་ཞང་བཙུན་ཡེར་པ་བ། ཡེར་པ་གཟིམ་ཁང་གི་སྒོམ་པ་དད་པ་བླ་མ། ར་སྒྲེང་དུ་བཤེས་གཉེན་སྟོན་པ། རྣལ་འབྱོར་པ་ཆེན་པོ། དཔལ་ལྡན་དགོན་པ་བ།