[A:༩༩ན]མོ་ལ། ཇོ་བོའི་གཞུང་དང་རྗེས་སུ་འབྲེལ་བ། ངག་དབང་གྲགས་པ་དང་། གསེར་གླིང་པ་ནས་བརྒྱུད་པའི་ཚེ་ཁྲིད་ལས་ཚོགས་མང་བ་དང་བཅས་པ། མི་གཡོ་བ་སྔོན་པོ་ལ་ཇོ་བོའི་གཞུང་དང་། དཔལ་ལྡན་དགོན་པ་བ། གུར་གྱི་ཉ་ག་མོར་སྒོམ་མཛད་ཀྱིན་བཞུགས་པ་ལ་བར་ཆད་ཀྱི་མཚན་མ་བྱུང་བ། ཇོ་བོ་ལ་ཞུས་པས། ང་ལ་རྣལ་འབྱོར་སྲུང་བའི་མན་ངག་ཡོད་གསུངས་ནས། མི་གཡོ་བའི་དམིགས་པ་སྐོར་གསུམ་དང་། སྒྲུབ་ཡིག་ཆེ་ཆུང་རྒྱུད་མན་ངག་དང་བཅས་པ་རྫོགས་པར་གནང་། ཁ་ཅིག སྒྲུབ་ཡིག་ཆེ་བ་བྱ་རྒྱུད་ཀྱི་ནང་གི་མི་གཡོ་བའི་རྒྱུད་ལ་ལེའུ་དང་ལས་ཚོགས་མང་དུ་ཡོད་པ་འདི་ཡིན་ཞེས་ཟེར། སྒྲུབ་ཡིག་བར་པ་སོགས་མན་ངག་རྣམས། དགོན་པ་བ་ནས་སྣེའུ་ཟུར་པ་ལ་བརྒྱུད་པ་དང་། བྱ་ཡུལ་བ་ནས་བརྒྱུད་པ་གཉིས་སྒྱེར་སྒོམ་ལ་བཞུགས་པ་སངས་རྒྱས་དབོན་ལ་གནང་། དེའི་གསུང་ལ་རྟོགས་ལྡན་བཟང་མོ་བས་ཟིན་བྲིས་སུ་བཏབ་པ་ད་ལྟ་ཡོད་པ་འདིའོ། །མི་གཡོ་བ་བླ་མེད་ཀྱི་རྒྱུད། ཕྱིས་ཤུད་སྒྱེ་ལོ་ཙཱ་བ་གྲགས་པ་རྒྱལ་མཚན་གྱིས་བསྒྱུར་ཅིང་། དབང་རྒྱུད་དང་བཅས་པ་བྱུང་ངོ་། །གཞན་ཡང་ཚོགས་བདག་དཀར་པོ་ལ། གསེར་གླིང་པ། ན་རོ་པ། ཁ་ཆེ་རིན་ཆེན་རྡོ་རྗེ་རྣམས་ཀྱི་རྒྱ་གཞུང་རེ། ཇོ་བོས་མཛད་པ་གཉིས་དང་ལྔ། ཚོགས་བདག་གི་སྐྱེས་རབས། གཟུངས་རིང་། ཕྱི་སྒྲུབ། ནང་སྒྲུབ། གསང་སྒྲུབ་ཀྱི་སྐོར། གསེར་གླིང་པས་ཇོ་བོ་ལ་གནང་བ་དང་། གཞན་ཡང་ལས་ཚོགས་ལེའུ་བཅོ་ལྔ་པ་དང་། ལེའུ་སུམ་ཅུ་སོ་གཅིག་པ་རྣམས་ཇོ་བོས་རྣལ་འབྱོར་པ། དེས་སྤྱན་སྔ་པ། དེས་བྱ་ཡུལ་པ་ལ་བརྒྱུད་པའོ། །ཚོགས་བདག་དཀར་པོ་འདི་འཇིག་རྟེན་པའི་ཚུལ་བསྟན་ཀྱང་། ཁ་ཅིག་སྤྱན་རས་གཟིགས་ཀྱི་སྤྲུལ་པར་བཞེད།