[A:༩༩བ]བཀའ་བརྒྱུད་འདིའི་ལུགས་ཀྱིས་བདུད་རྩི་འཁྱིལ་པའི་སྤྲུལ་པར་བཞེད་དེ་མི་འགལ་ལོ། །ཡང་ཛམྦྷ་ལ་དཀར་པོ་འབྲུག་བཞོན་ལྷ་མོ་བཞིས་བསྐོར་བ་ནི་ཇོ་བོ་རི་བོ་པོ་ཏ་ལའི་འགྲམ་ན་བྱོན་པའི་དུས། སྤྱན་རས་གཟིགས་ཀྱིས་ཞལ་དངོས་སུ་བསྟན་ནས་གནང་སྟེ། ཕྱི་ནང་གསང་གསུམ་གྱི་ལས་ཚོགས་དང་། ཆུ་སྦྱིན་བྱ་ཐབས་སོགས་དང་། སྨེ་བརྩེགས་ལྗང་ཁུའི་སྒྲུབ་ཐབས་ལས་ཚོགས་དང་བཅས་པ་དང་། གཙུག་ཏོར་དྲི་མེད། གཙུག་ཏོར་གདུགས་དཀར་གྱི་རྗེས་གནང་ལ་སོགས་པ་ཇོ་བོ་ནས་བརྒྱུད་པ་ད་ལྟ་མ་ཆད་པ་མང་དུ་བཞུགས་སོ། །ཇོ་བོ་ནས་བརྒྱུད་པའི་དབང་བརྒྱུད་ཡོད་པ་ལ། བདེ་མཆོག་ལཱུ་ཧི་པ། བདེ་མཆོག་བཅུ་གསུམ་མ། གསང་འདུས་འཕགས་ལུགས། ཡེ་ཤེས་ཞབས་ལུགས། ཇོ་བོ་ཉིད་ཀྱི་གསང་འདུས་འཇིག་རྟེན་དབང་ཕྱུག མཧཱ་མ་ཡ། ཡོ་ག་གཙུག་དགུ ཀུན་རིག་ཇོ་ལུགས། སྣུར་པ་རྣམས་དེ་ལས་བརྒྱུད་ཅིང་ཕྱག་ལེན་མཛད་པས་སྣུར་ལུགས་སུ་གྲགས་པ་དང་། རྡོ་རྗེ་ཕག་མོ་རིན་ཆེན་རྒྱན་དང་། སྤྱན་རས་གཟིགས་ལྷ་མང་དུ་གྲགས་པ། ཀླུ་སྒྲུབ་དང་། ཇོ་བོ་ཉིད་ཀྱིས་མཛད་པའི་གཞུང་དང་རྗེས་སུ་འབྲེལ་བའི་དབང་བཀའ་ལ་སོགས་པ་ད་ལྟ་བཞུགས་པ་མང་དུ་ཡོད་པར་སེམས་སོ། །ཆོས་སྐྱོང་སྐོར་ལ། བཀའ་གདམས་པ་སྤྱི་ལ་གྲགས་པ། མགོན་པོ་གྲི་གུག་ལ་གཙོ་རྐྱང་ལྷ་གསུམ། ལྷ་བཞི། ལྷ་ལྔ། ལྷ་མང་སོགས་ལུགས་མང་དུ་འདུག་པ་རྣམས་ལ་མགོན་པོའི་རྒྱུད་འགའ་རེ་དང་། རྒྱ་གཞུང་ཆེ་ཆུང་བཅོ་ལྔ་ཙམ་སྣང་བའི་གཙོ་རྐྱང་ལ་ཇོ་བོ་ཆེན་པོ་དང་། ཨ་ཝ་དྷཱུ་ཏི་པ་གཉིས་ཀྱི་གཞུང་རེ་དང་། དེ་ལ་པཎྜི་ཏ་འཇམ་དཔལ་དབྱངས་ཀྱི་འགྲེལ་པ་དང་། གཙོ་འཁོར་གསུམ་དུ་བྱེད་པ་པཎྜི་ཏ་གྲགས་པ་རྡོ་རྗེའི་རྒྱ་གཞུང་དང་། དེའི་གསལ་བྱེད་བྱ་ཡུལ་བས་