[A:༡༠༠ན]མཛད་པ་ལ་བརྟེན་པ་བྱིན་རླབས་ཀྱི་བརྒྱུད་པ་ཡང་མངའ་བས། བླ་མ་གོང་མ་རྣམས་འདི་མཛད་པ་མང་ལ། ལྷ་བཞི་བྱེད་ན། མགོན་པོའི་མདུན་དུ་གནོད་སྦྱིན་ལག་ན་རྡོ་རྗེ། རྡོ་རྗེ་གསོར་ཐབས་སུ་འཛིན་པ། གནོད་སྦྱིན་གྲངས་མེད་པའི་ཚོགས་ཀྱིས་བསྐོར་བ། ན་རོ་པའི་གཞུང་དང་། བསྐུལ་ནས་འབྱུང་བ་བཞིན་བསྐྱེད་པ་དང་། ཡང་ལག་ན་རྡོ་རྗེའི་དོད་དུ་མགོན་པོ་ཏྲག་ཤད་ཡོད་པ། བོད་ཀྱིས་བྱས་པའི་ལྷ་བཞི་ཞིག་ཀྱང་འདུག་གོ །ལེགས་སྲེད་དམར་པོ་འདི་ལྷོ་ནུབ་པ་ཡིན་པར་བཞེད་ཅིང་། མདུན་དུ་བསྐྱེད་ནས། ལས་ལ་སྐུལ་བའི་སྒྲུབ་ཡིག་ཀྱང་ཡོད་དོ། །ཡང་ཇོ་བོའི་རྒྱ་གཞུང་དུ། གཙོ་བོ་ལ་མཁའ་འགྲོ་མ་བཞིས་བསྐོར་བའི་ལྷ་ལྔ་ཞིག་གསུངས་པ་དང་། ཡང་གྲི་གུག་རིགས་ལྔ་དང་། གཙོ་བོ་ལ་གཤིན་རྗེ་ཕོ་བརྒྱད་མོ་བརྒྱད་ཀྱིས་བསྐོར་བ། ལྷ་བཅུ་བདུན་ཟངས་གྲི་ཅན་དུ་གྲགས་པ་གཉིས་ལ། བྲམ་ཟེ་མཆོག་སྲེད་ཀྱི་གཞུང་ཆེ་ཆུང་། དབང་རྒྱུད་དང་བཅས་པ་ཡོད་པ་དང་། ཡང་གཙོ་བོ་ལ་ཡེ་ཤེས་ཞབས་ལུགས་ཀྱི་ཕྱོགས་སྐྱོང་བཅོ་ལྔས་བསྐོར་བ་དང་། མགོན་པོ་རྟ་མང་དུ་གྲགས་པ་མགོན་པོས་བསྐུལ་ནས་འབྱུང་བ་སོགས་ཡོད་པས། དེ་དག་གི་མངོན་རྟོགས་དང་། རྒྱ་གཞུང་གང་ནས་གང་བཤད་སོགས་དོན་དུ་གཉེར་ན་གཞན་དུ་བལྟའོ། །ཡང་མགོན་པོ་ལྷོ་ནུབ་པ། ཞལ་དམར་བ། མི་ཐུང་གསོད་བྱེད། མཐར་སྐྱེས་མ་ཞེས་མཚན་གྱི་རྣམ་གྲངས་བཞི་དང་ལྡན་པ་འདི་ལ། ཇོ་བོའི་རྒྱ་གཞུང་དང་། དེའི་གསུང་བཤེས་གཉེན་སྟོན་པས་བཀོད་པའི་གབ་པ་སྔོན་བྱུང་དུ་གྲགས་པ། ཕྱི་སྒྲུབ། ནང་སྒྲུབ། གསང་སྒྲུབ་སོགས་ལ་ཕྱིས་ཀྱིས་བྱས་པའི་ཡིག་ཆ་མང་དུ་འདུག་ལ། འདི་དབང་གི་གྲི་གུག་ཡིན་པར་རིན་པོ་ཆེ་ཆོས་ཀྱི་རྗེས་བཞེད་དོ། །གྲི་གུག་