[A:100a]mdzad pa la brten pa byin rlabs kyi brgyud pa yang mnga' bas/ bla ma gong ma rnams 'di mdzad pa mang la/ lha bzhi byed na/ mgon po'i mdun du gnod sbyin lag na rdo rje/ rdo rje gsor thabs su 'dzin pa/ gnod sbyin grangs med pa'i tshogs kyis bskor ba/ na ro pa'i gzhung dang / bskul nas 'byung ba bzhin bskyed pa dang / yang lag na rdo rje'i dod du mgon po trag shad yod pa/ bod kyis byas pa'i lha bzhi zhig kyang 'dug go /legs sred dmar po 'di lho nub pa yin par bzhed cing / mdun du bskyed nas/ las la skul ba'i sgrub yig kyang yod do/ /yang jo bo'i rgya gzhung du/ gtso bo la mkha' 'gro ma bzhis bskor ba'i lha lnga zhig gsungs pa dang / yang gri gug rigs lnga dang / gtso bo la gshin rje pho brgyad mo brgyad kyis bskor ba/ lha bcu bdun zangs gri can du grags pa gnyis la/ bram ze mchog sred kyi gzhung che chung / dbang rgyud dang bcas pa yod pa dang / yang gtso bo la ye shes zhabs lugs kyi phyogs skyong bco lngas bskor ba dang / mgon po rta mang du grags pa mgon pos bskul nas 'byung ba sogs yod pas/ de dag gi mngon rtogs dang / rgya gzhung gang nas gang bshad sogs don du gnyer na gzhan du blta'o/ /yang mgon po lho nub pa/ zhal dmar ba/ mi thung gsod byed/ mthar skyes ma zhes mtshan gyi rnam grangs bzhi dang ldan pa 'di la/ jo bo'i rgya gzhung dang / de'i gsung bshes gnyen ston pas bkod pa'i gab pa sngon byung du grags pa/ phyi sgrub/ nang sgrub/ gsang sgrub sogs la phyis kyis byas pa'i yig cha mang du 'dug la/ 'di dbang gi gri gug yin par rin po che chos kyi rjes bzhed do/ /gri gug