[A:19b]rgyal zhabs la/ de rnams kyi rnam thar don du gnyer na kho bos byas pa'i dpal 'khor lo bde mchog gi chos 'byung rgyas bsdus sogs su blta bar bya'o/ /de nas te lo pa dang / nA ro pa rnams las brgyud pa ni ring brgyud yin la/ nye brgyud kyi dbang du byas na/ te lo pa'i rnam thar ni/ de dang po rgyal rigs las rab tu byung ste/ mtshan shes rab bzang po zhes par btags/ rig pa'i gnas rnams la sbyangs pas mkhas pa chen por gyur nas/ bla ma rnam rgyal zhabs la gtugs/ dpal 'khor lo sdom pa'i dkyil 'khor du dbang bskur/ rgyu man ngag dang bcas pa zhus/ der bla mas lung bstan te shar phyogs bhaM ga la'i rgyud/ ha ri ke la zhes bya ba za hor gyi grong khyer de na sprul pa'i rgyal po utma skyes pa zhes bya bas byin gyis brlabs pa'i sgrub thag nye ba'i gnas yod/ de na panytsa pa ta na zhes bya ba'i tshong 'dus na smad 'tshong ma til rdung ba zhig yod kyis/ de'i g.yog gyis la rtogs pa sbyongs shig ces lung bstan pa der byon te/ smad 'tshong ma'i g.yog byas pas/ mos til brdung du bcug te/ slob dpon gyis til brdungs shing nyams su blangs pas/ til la mar gnas kyang rdung ba dang btsir ba ma byas na mngon du mi 'gyur/ de bzhin du rang sems sangs rgyas gnas kyang nyams len ma byas na mngon du mi 'gyur bar dgongs te nyams su blangs pas de kho na nyid mngon sum du gyur pa'i rtogs pa skyes te/ rdo rje 'chang gi mngon sum du dbang bskur byin gyis brlabs nas phyag rgya chen po mchog gi dngos grub thob bo/ /der smad 'tshong mas khong mtshan