[A:༣༠བ]གདའ་བས་ཁོ་རང་དང་བསྟུན། ཁོ་ན་རེ། འོ་ན་པཎྜི་ཏ་གདན་འདྲེན་པའི་འཕྲོ་བཤོལ། ངའི་བསྟན་པ་ལ་ཞུགས། ཡང་ན་གསེར་རྒྱལ་པོ་རང་དང་མཉམ་པ་ཁྱེར་ལ་ཤོག དེ་ནས་བཏང་གི་ཟེར་བས། གསེར་ལ་འདམ་ནས་ལུས་དང་མཉམ་པས་བསླུས་ཀྱང་མ་ཉན། དེ་ནས་ཁོ་བོ་ལ། ད་ངས་དབུ་ཙམ་ཅིག་བརྙེད་པ་དང་བསླུར་འོང་གིས་ཞུས་པས། བཞད་ཅིག་མཛད་ནས། ད་དེས་ཆོག ངའི་བསམ་པ་ལ་བོད་འདི་ཆོས་ཁྲིམས་མ་འཆོས་པར་ཤི་ན་མི་རུང་སྙམ་པ་ཡིན་ཏེ། ད་ན་སོ་ཡང་རྒས། འཁོར་བ་ཐོགས་མེད་ནས་ཆོས་ཀྱི་ཕྱིར་དུ་ལུས་བཏང་པ་མེད། ད་ལེན་ཆོས་ཕྱིར་ཤི་ན་ལེགས་པ་ཡིན་པས། སྡིག་རྒྱལ་འདི་ལ་གསེར་སེ་བ་གཅིག་ཀྱང་མ་སྟེར། གསེར་ཐམས་ཅད་རྒྱ་གར་དུ་ཁྱེར་ལ། ད་དུང་ཨ་ཏི་ཤ་གདན་ཅི་འདྲོངས་གྱིས། པཎྜི་ཏ་ཆེན་པོའི་སྙན་དུ་ཡང་། ངས་ཁྱོད་དང་སངས་རྒྱས་ཀྱི་བསྟན་པའི་ཕྱིར་དུ་ལུས་སྲོག་གར་ལོག་གི་རྒྱལ་པོ་ངན་པ་ལ་བྱིན་ཡོད་པས། ཚེ་རབས་ཐམས་ཅད་དུ་བདག་ཐུགས་རྗེས་འཛིན་པ་དང་། ངའི་བསམ་པའི་གཙོ་བོ་ཁྱེད་བོད་དུ་བྱོན་ནས་སངས་རྒྱས་ཀྱི་བསྟན་པ་དར་བར་བྱེད་པ་ཡིན་པས། དེ་ཁོ་ན་བཞིན་དུ་མཛད་པར་ཞུ། སྐྱེ་བ་འདིའི་འོག་རོལ་ཏུ་ཁྱེད་དང་ངེས་པར་མཇལ་བར་བྱིན་གྱིས་བརླབས་ཏུ་གསོལ། ཞེས་ང་འཕྲིན་དུ་མཛོད་ཅིག དེ་ལྟར་ལགས་པས་ང་བློས་ཐོང་ལ། སངས་རྒྱས་ཀྱི་བསྟན་པ་ལ་སོམས་ཤིག་གསུངས་པ་ཡིན་པས། དེས་ན་ཁུ་བོ་གར་ལོག་གི་རྒྱལ་པོས་མེད་པར་བྱས་པས་གཏམ་དེ་རྣམས་མགོན་པོ་ཨ་ཏི་ཤའི་སྙན་དུ་ཐོས། ངེད་བོད་མཐའ་འཁོབ་ཀྱི་སེམས་ཅན་མ་རིག་པ་རྣམས་ཀྱི་སྙིང་སྟོབས་དེ་འདྲ་ན། ཁྱེད་འགྲོ་བའི་སྐྱབས་གནས་ཐུགས་