[A:༣༡ན]རྗེ་ཅན་ཇི་ལྟར་སོང་། ཞེས་ཞུས་ཤིག འདི་ན་གསེར་སྲང་བདུན་བརྒྱ་ཡོད་པ་བླ་མའི་ཕྱག་ཏུ་ཕུལ། ངེད་བོད་པྲེ་ཏ་པུ་རིའི་གྲོང་ཁྱེར་ལྟ་བུ་ན། གསེར་སེ་བ་རེ་ཙམ་ལའང་རྩིས་ཆེན་པོ་ཡོད་ལ། ད་འདིས་བདག་ཅག་མི་ནོར་ཐམས་ཅད་རྫོགས་ནས་ཡོད་ཀྱི། ད་ལན་ཇོ་བོ་བོད་ལ་མ་བྱོན་ན། ཁྱེད་དམ་པ་རྣམས་ཀྱི་ཐུགས་རྗེ་ཡང་དེ་ལྟར་བས་པས། ངེད་ཀྱང་བྱ་བ་ཅི་བདེར་སྤྱད་པར་བགྱིའོ། །ཞེས། ཁྱེད་འདུལ་བ་འཛིན་པས་ལོ་རྒྱུས་འདི་རྣམས། ཇོ་བོ་ལ་ཞུས་པའི་ཐ་མ་འབྱོན་དུ་མ་བཞེད་ནའང་སྙན་དུ་ཐེབས་པ་མཛོད། གསུངས་ནས་ཤུམས་ཤིང་གསུང་བྱོན་ཏེ། དེའི་ཚེ་ལྷ་བཙུན་པ་མི་ཆེན་པོ་ཅིག་གིས་དེ་ལྟར་མཛད་པས། ལོ་ཙཱ་བས་ཀྱང་ཡིན་མིན་གྱི་ཚིག་ཟུར་ཙམ་ཡང་སྨྲ་མ་ནུས། དེའི་སྟོབས་ཀྱིས་ལུས་སྲོག་དང་ལམ་གྱི་དཀའ་ཚེགས། ཚེ་འདིའི་བདེ་སྐྱིད་གང་ལ་ཡང་མ་ཆགས་པར། དཔོན་གཡོག་བདུན་གྱིས་གསེར་རྣམས་ཁྱེར་ཏེ། རྒྱ་གར་གྱི་ལམ་དུ་ཞུགས་པ་དང་ལྷ་བཙུན་པས་སྐྱེལ་ཐུང་མཛད་དེ། དགེ་སློང་ཁྱེད་ཀྱིས་ངེད་ཀྱི་བྱ་བ་བྱས། །ད་ལན་དཀའ་བ་ཆེ་ནའང་ཕར་བྱོན་ལ། །འབད་རྩོལ་ཆེན་པོས་ལུས་དང་སྲོག་ལ་བརྡོས། །འཁོར་ནས་བྱས་ཤེས་བཀའ་དྲིན་བཟོ་བར་བྱ། །ཞེས་གསུངས་ནས། ཕྱི་ཕྱག་མཛད་ནས་གཤེགས། སླར་ཡང་ཇོ་བོ་ཐུགས་རྗེ་ཆེན་པོ་ལ་གསོལ་བ་འདེབས་ཀྱི་གཤེགས་པར་ཞུ་གསུངས། དེ་ནས་བལ་པོ་རྫོང་ལ་བྱོན་ཙ་ན་མི་རེང་གཅིག་དང་འཕྲད་པས། ཁྱེད་ཡུལ་ས་ཐག་རིང་པོར་དོན་ཆེན་པོ་ལ་འགྲོ་བར་སྣང་བ་འདི་སྐད་ཟེར་གྱིན་སོང་དང་དོན་གྲུབ་ནས་འོང་གི དཀོན་མཆོག་གསུམ་ལ་ཕྱག་འཚལ་ལོ། །ཁ་བ་ཅན་གྱི་རྒྱལ་ཁམས་སུ། རྒྱལ་བ