[A:༣༡བ]་ཐམས་ཅད་ཀྱི་འབྱུང་གནས། དམ་པའི་ཆོས་འཕེལ་བར་གྱུར་ཅིག ཅེས་བརྗོད་ཅིང་སོང་ན་ལམ་དུའང་ཉེ་ཞོ་མི་འབྱུང་ཟེར། ཁྱེད་སུ་ལགས་བྱས་པས། རིམ་གྱིས་ཤེས་པར་འགྱུར་གྱིས་ཟེར། དེ་ནས་བལ་པོའི་མཐའ་འཁོབ་ཏུ་སླེབ་པ་ན། ཨ་ཙ་ར་ལ་གནས་གཡར་བས་སྙུག་ཁང་ཅིག་ཏུ་བསྙལ། ཁོས་གསེར་ཡོད་པར་ཤེས་ནས། སྙུག་ཁང་ལ་མེ་སྤར་ཏེ་བསད་ནས་གསེར་འཁྱེར་བར་འདོད་པ་ན། ལོ་ཙཱ་བ་དཔོན་གཡོག་ས་ཐག་རིང་པོ་ལ་ངལ་ཞིང་། ཚད་པས་གདུངས་གཉིད་ཀྱིས་མྱོས་པའི་སྔས་མགོར། མི་རེང་དཀར་པོ་ཅིག སྙུག་ཁང་གི་མཐོངས་ཕྱེ་ནས་བྱུང་སྟེ། མ་ཉལ་མ་ཉལ་མྱུར་དུ་ཡར་ལ་ལོངས། །མ་ཕེབས་ད་ལྟ་ལོངས་ལ་ལམ་དུ་ཞུགས། །ཉལ་ན་རིན་ཆེན་སྲོག་དང་འབྲལ་བ་ཡོད། །ང་ནི་བོད་ཁམས་ཡོངས་ཀྱི་ཡི་དམ་ཡིན། །ཞེས་གསུངས་པས། ཐུགས་རྗེ་ཆེན་པོ་ལ་གསོལ་བ་བཏབ་ནས་བྲོས། ནམ་ལངས་པ་དང་། བལ་པོའི་རྒྱལ་ཕྲན་ཅིག བྷི་ཀྲ་མ་ལར་འགྲོ་བ་དང་འཛོམ་སྟེ། དེ་དང་འགྲོགས་ནས་ཆུ་བོ་གངྒཱའི་འགྲམ་དུ་སླེབས་པ་དང་། རྒྱལ་པོ་དབང་ཆེ་བས་སྔོན་དུ་གྲུ་ལ་སོང་། དེར་ཉི་མ་ཕྱིས་པས་གསེར་རྣམས་བྱེ་མའི་འོག་ཏུ་སྦས་ཏེ། ཕྱོགས་གཞན་ཞིག་ཏུ་ཉལ་བ་ན། གཉན་པ་དཀར་པོ་གཅིག་གྲུ་ལ་སྐྱ་བ་ཆལ་ཆལ་འདེབས་ཀྱིན་བྱུང་། དེར་ལོ་ཙཱ་བས་ཁྱེད་སུ་ཡིན་གར་གཤེགས་དྲིས་པས། དཔོན་གཡོག་འཁོར་བཅས་བསུ་རུ་འོང་བ་ཡིན། །སེམས་ཅན་སྙིང་སྟོབས་ཆེན་པོས་འདིར་འོང་ཚེ། །འཕགས་པ་གྲུ་དང་མཉན་པ་ལྟ་བུ་ཡིས། །འཇིགས་པའི་དུས་སུ་སུ་བསྐྱེལ་མ་བྱས་ན། །སེམས་ཅན་ཉོན་མོངས་ཅན་གྱིས་ཇི་ལྟར་འགྲུབ། །ཚུར་ཞུགས་