[A:༣༧ན]འབྱོན་པའི་ཐག་ཆོད་ཀྱི་ཞལ་བཞེས་དང་། གཙུག་ལག་ཁང་གི་གཉེར་གཏད་ཐམས་ཅད་མཛད་དེ། གཞན་གྱི་མིག་བྲིད་པའི་ཕྱིར་རེས་གར་གཤེགས། རེས་འགའ་གཤེགས་པ་ལྟར་མཛད་ནས། བོད་དུ་འབྱོན་པར་ཆས་པ་ན་སྐུ་གསུང་ཐུགས་ཀྱི་རྟེན་དང་། དཔེ་རྣམས་སྤྲུལ་པའི་མི་གཉིས་ཀྱིས་གཡག་ཁྱུ་གཅིག་དེད་བྱུང་སྟེ། ས་ཐག་རིང་པོར་འགྲོ་བ་ལ་ཟར་སྔ་དགོས་པ་ཡིན་ཟེར་ནས་དྲངས་སོང་། ནངས་པར་ཇོ་བོས། གནས་བརྟན་རཏྣ་ཨ་ཀ་ར་ལ། བོད་འདི་རྣམས་ལ་གནས་ཆེན་རྣམས་ཀྱི་གཙུག་ལག་ཁང་སྟོན་པ་དང་། མཆོད་པ་རེ་སྐྱེལ་དུ་འགྲོ་བས་བདེ་བར་བཞུགས་པ་ཞུ་གསུངས་པས། གནས་བརྟན་གྱི་ཞལ་ནས་དེ་ལྟར་ལེགས། ངེད་ཀྱང་རྗེས་སུ་འཇུག་པར་ཞུ་ཟེར་ནས། གནས་ཆེན་མང་དུ་བྱོན་པའི་རྗེས་སུ། གནས་བརྟན་ཆེན་པོ། ངེད་མི་དྲའི་གཙུག་ལག་ཁང་དུ་འགྲོ་བས། ཁྱོད་ཤུགས་ཐག་རིང་པོ་ལ་འོ་བརྒྱལ་གསུངས་པས། གནས་བརྟན་གྱི་ཐུགས་ལ། ད་བོད་དུ་འབྱོན་པར་སྣང་སྙམ་ནས། ནག་ཚོ་ལ་ཚེ་དང་ལྡན་པ་ཁྱོད་སློབ་གཉེར་ལ་འོང་ཟེར་ནས་ངའི་པཎྜི་ཏ་རྐུར་འོང་པར་སྣང་། འོན་ཀྱང་བོད་ཀྱི་ཆོས་རྒྱལ་བྱང་ཆུབ་སེམས་དཔའ་དེ་ལ་སེམས་བརྩེ་ཞིང་། དེའི་མི་ནོར་མང་པོ་ཆུད་ཟོས་པ་དང་། ཁྱོད་ཀྱང་ངའི་སློབ་མ་ཡིན་པས་ལོ་གསུམ་སྤྱན་དྲོངས། དེ་ནས་ཚུར་སྤྱན་མ་དྲངས་ན་རྒྱ་གར་ཡང་བསྟན་པ་ནུབ་པ་ཙམ་དུ་འགྲོ་བ་ཡོད་གསུངས་པས། ནག་ཚོས་ཀྱང་ཁས་བླངས། དེར་ཇོ་བོའི་ཞལ་ནས་གསེར་སྲང་རྣམས་ཁྱེར་ཤོག་གསུངས་ནས། ཆ་བཞིར་བགོས་ཏེ་བླ་མ་རྣམས་དང་། དགེ་འདུན་སྤྱི་དང་། བི་ཀྲ་