[A:༣༧བ]མའི་རྒྱལ་པོ་དང་། གཙུག་ལག་ཁང་རྣམས་ལ་བསྔོས། གཏད་གཉེར་ཐམས་ཅད་རཏྣ་ཨ་ཀ་ར་ལ་མཛད་དེ་ཕྱིར་ལྡོག་གོ །དེ་ཡང་ཇོ་བོ་དགུང་ལོ་ང་བདུན་བཞེས་པ་སྟག་གི་ལོ་ལ་རྒྱ་གར་ནས་བཏེགས། ཁ་ཅིག་ང་དགུ་བཞེས་པའི་ལྕགས་ཕོ་འབྲུག་ལ་བཏེགས་པ་དང་། ཁ་ཅིག་དགུང་ལོ་རེ་གཅིག་ལ་བཏེགས་པར་འདོད་དེ། སྔ་མ་འཐད་པར་སེམས་སོ། །དེ་ནས་ཇོ་བོ་དཔོན་སློབ་མི་དྲའི་གཙུག་ལག་ཁང་ནས་རྒྱ་གར་གྱི་སའི་མཐའ་ལ་བྱོན་པ་ན། མུ་སྟེགས་ཀྱི་གཅེར་བུ་པ་བཅོ་བརྒྱད་ཙམ་རྫུ་འཕྲུལ་གྱིས་ང་རྒྱལ་ལ། བོད་དུ་སངས་རྒྱས་ཀྱི་བསྟན་པ་དར་བ་ལ་ཕྲག་དོག་གིས། དེར་རྫུ་འཕྲུལ་གྱིས་ལྷགས་ནས། ཇོ་བོ་དཔོན་སློབ་རྣམས་ལ་བར་ཆད་བྱེད་པར་བརྩམས་པས། ཇོ་བོས་སྒྲོལ་མའི་བསྐྱེད་རིམ་གྱིས། རེངས་པར་བྱེད་པའི་ཇག་ཆིངས་མཛད་དེ། ཐམས་ཅད་ལྡེར་བཟོ་བཞིན་དུ་སོང་། དེ་ནས་བལ་པོའི་མཐར་ཕེབས་པ་ན། མུ་སྟེགས་བསམ་པ་ངན་པས་རང་ཕུང་བར་བྱས་པ་ཡིན་གསུངས་ནས་བྱེ་མ་ལ་སྔགས་བཏབ་སྟེ་ཚོང་པ་ལ་བསྐུར་ནས། ལམ་ཁ་ན་གཅེར་བུ་བ་འདི་འདྲ་བ་ཡོད་པས་བྱེ་མ་འདི་ཐོར། ལངས་འོང་གིས་བྲེད་མི་དགོས། ངེད་ཀྱིས་བཅིངས་པ་ཡིན་གསུངས། ཚོང་པ་རྣམས་ཀྱིས་དེ་ལྟར་བྱས་པ་གྲོལ་ཏེ་སོང་ངོ་། །དེ་ནས་འཕགས་པ་ཤིང་ཀུན་ཏུ་ཕྱགས་ཕེབས་པ་ན་རྒྱ་གར་ནས་ཁྱེར་བའི་དངོས་སྤྱད་རྣམས་དང་། ལྷ་བཙུན་པའི་བསུ་བ་གཙོ་བོ་མི་དྲུག་ཀྱང་དེར་སླེབས། དཀོན་མཆོག་མཆོད་པ་དང་། བོད་ལུགས་ཀྱི་གདན་གྱི་བཀོད་པ་བཟང་པོ་བཤམས། ཇོ་བོ་ཏ་ལའི་བསིལ་གྲིབ་ལ་གྲལ་གྱི་གུང་ལ་སྤྱན་དྲངས། གཙོ་བོ་