[A:༣༨ན]གསུམ་པ་བྱ་བས། དཀར་ཡོལ་འབྲུག་རྒྱབ་གསེར་སྲང་ལྔ་རི་བ་ཇ་བཙོ་མས་བཀང་སྟེ་ཕུལ་བས། འདི་ལ་ཅི་ཟེར་གསུངས། བོད་ཀྱི་རབ་ཏུ་བྱུང་བའི་བཏུང་བ་ཇ་ཟེར་ཞུས་པས་ཤིན་ཏུ་མཉེས། ཇ་བུ་རམ་སོགས་ཀྱིས་བསྙེན་བཀུར། གཙོ་བོ་མི་དྲུག་གིས་རྟ་མཆོག་དཀར་པོ་མཐོང་སྨོན་རླུང་གཤོག་བྱ་བ། རིན་པོ་ཆེ་སྣ་ཚོགས་ཀྱིས་བརྒྱན་པ་ཞིག་དང་། དར་དཀར་པོ་ཡུག་རེ་ཕུལ། དེར་དགེ་བསྙེན་ཆོས་འཕེལ་གྱི་སྤྲུལ་པ་འབྲོག་ཕྲུག་ཅིག་གིས། ལི་ཡུལ་ནས་ཇོ་བོ་འཇམ་དཔལ་རྡོ་རྗེ། ལིའི་རྒྱལ་པོའི་ཞུ་ཡིག་དང་བཅས་ཏེ་ཕེབས་པས། ཇོ་བོའི་ཞལ་ནས། རྟེན་འབྲེལ་ཐམས་ཅད་ལེགས་གསུངས་ཏེ་ཤིན་ཏུ་མཉེས། དུས་དེར་ལོ་ཙཱ་བ་རྒྱ་བརྩོན་སེང་བསྙེལ་བའི་ཚུལ་བསྟན་ནས། ད་ནི་ཨུ་པཱ་སི་ཀ་ཡོད། །ང་ནི་རང་བཞིན་གནས་སུ་འགྲོ །མི་ལ་ཡིད་ཆེས་མི་སྐྱེ་བས། །ཤི་བ་སྐད་དུ་དུར་དུ་སྐྱོལ། །ང་ནི་འོད་གསལ་སེམས་ཀྱི་ལུས། །འབྱུང་གནས་དེ་ལ་ཐིམ་ནས་འགྲོ །རྒྱ་བོད་གཉིས་སུ་བྱ་བ་བྱས། །ཁ་བ་ཅན་དུ་གཅིག་གིས་ཆོག །ཅེས་གསུངས་ཏེ་མཁའ་སྤྱོད་དུ་གཤེགས་སོ། །དེ་ནས་ཇོ་བོ་དཔོན་སློབ་བལ་པོའི་རྒྱལ་པོ་གྲགས་པ་མཐའ་ཡས་ཀྱིས་སྤྱན་དྲངས། ཇོ་བོའི་ཆིབས་གླང་པོ་ཆེ་མཐོང་སྨོན་བྱ་བ་རྒྱལ་པོས་གནང་སྟེ། ང་ཐང་འདིར་བྷི་ཧ་ར་ཞེས་པའི་གཙུག་ལག་ཁང་བཞེངས་པས། འབྱོར་པ་ཅི་དགོས་པ་དང་། རྒྱ་གར་དང་བོད་ཀྱི་རབ་ཏུ་བྱུང་བའི་གྲངས་འཛུགས་པའི་རྒྱུ་བྱིན་ཅིག ཅེས་གསུངས་པས། རྒྱལ་པོ་དད་དེ་ཞབས་སྤྱི་བོར་བླངས། གང་བཞེད་པ་ཐམས་ཅད་བསྒྲུབ་པར་དམ་བཅས། སྲས་པདྨའི་སྙིང་པོ་ཕུལ་ནས་རབ་ཏུ་