[A:༤༧བ]བས་ཆོས་ཐོབ་ཅིང་བཀའ་དྲིན་གྱིས་ཁྱབ་པ་ལས། དེ་རྣམས་ཀྱི་ནང་ནས་ཆོས་བརྒྱུད་འཛིན་པ་ལ་སློབ་མ་གྲགས་ཆེ་བ་བྱོན་ཚུལ་དང་། སློབ་མ་མཆོག་བྱོན་ཚུལ་ལོ། །དང་པོ་ནི། མངའ་རིས་སྐོར་གསུམ་ནས་ལྷ་བྱང་ཆུབ་འོད་དང་། ཕོ་བྲང་ཞི་བ་འོད། ལོ་ཆེན་རིན་བཟང་། རྒྱ་བརྩོན་སེང་། ནག་ཚོ་ལོ་ཙཱ་བ། ལོ་ཆུང་ལེགས་ཤེས། མང་ཡུལ་ལོ་ཙཱ་བ་གྲགས་འབྱོར་ཤེས་རབ། འབྲོ་ལོ་ཙཱ་བ་ཤེས་རབ་འོད། ལོ་ཙཱ་བ་དགེ་བློ། ལོ་ཙཱ་བ་ཤཱཀྱ་བློ་གྲོས། གོ་མི་བསྒོམ་ཆེན། འདུལ་འཛིན་གཟུས་རྡོ་རྗེ་རྒྱལ་མཚན། གནས་བརྟན་གསེར་བཟོ་རྣམས་བྱོན་པ་ལས། ལྷ་བཙུན་པས་ཇོ་བོ་ཆེན་པོའི་ཆོས་མང་དུ་མཁྱེན། འཇིག་རྟེན་དབང་ཕྱུག་གི་ཞལ་གཟིགས། མངོན་ཤེས་ལྔ་ཐོབ་བོ། །ལོ་ཆེན་རིན་ཆེན་བཟང་པོ་ནི། རིགས་ཁ་ཆེའི་གཡུ་རི་གཡུ་སྒྲ་བྱ་བ། ཡབ་གཞོན་ནུ་དབང་ཕྱུག ཡུམ་ཅོག་རོ་ཀུན་བཟང་ཤེས་རབ་བརྟན་མ། ལྕམ་སྲིང་བཞི་ཡོད་པའི་གཅེན་ཤེས་རབ་དབང་ཕྱུག་གི་གཅུང་རིན་ཆེན་དབང་ཕྱུག་ཏུ་སྐུ་སྐྱེ་བ་བཞེས། དགུང་ལོ་བཅུ་གསུམ་ལ་མཁན་པོ་ལེགས་པ་བཟང་པོ་ལས་རབ་ཏུ་བྱུང་སྟེ། མཚན་རིན་ཆེན་བཟང་པོར་གསོལ། དེའི་མོད་ལ་འདུལ་བ་རྒྱ་ཆེར་འགྲེལ་ཐུགས་སུ་ཆུད། དེ་ནས་རྒྱལ་པོའི་བཀས་ཁ་ཆེར་བྱོན། ལོ་ཙཱ་མཁས་པར་བསླབས། པཎྜི་ཏ་ཀ་ར་རྣམ་གསུམ་སོགས་རྒྱ་གར་གྱི་པཎ་གྲུབ་དུ་མ་ལ་གཏུགས། ཐེག་པ་མཐའ་དག་གི་ཆོས་ལ་སྦྱངས། བསྟན་པ་ལ་བྱ་བ་ཆེར་མཛད། ཨ་ཏི་ཤ་དང་པུ་རངས་སུ་མཇལ་ཏེ། གུ་གེ་ཁྲི་ཐང་པས་མཛད་པའི་ལོ་ཆེན་གྱི་རྣམ་ཐར་ལས། དགུང་ལོ་བརྒྱད་ཅུ་རྩ་བདུན་ལ་མཇལ་བར་གསུངས།