[A:47b]bas chos thob cing bka' drin gyis khyab pa las/ de rnams kyi nang nas chos brgyud 'dzin pa la slob ma grags che ba byon tshul dang / slob ma mchog byon tshul lo/ /dang po ni/ mnga' ris skor gsum nas lha byang chub 'od dang / pho brang zhi ba 'od/ lo chen rin bzang / rgya brtson seng / nag tsho lo tsA ba/ lo chung legs shes/ mang yul lo tsA ba grags 'byor shes rab/ 'bro lo tsA ba shes rab 'od/ lo tsA ba dge blo/ lo tsA ba shAkya blo gros/ go mi bsgom chen/ 'dul 'dzin gzus rdo rje rgyal mtshan/ gnas brtan gser bzo rnams byon pa las/ lha btsun pas jo bo chen po'i chos mang du mkhyen/ 'jig rten dbang phyug gi zhal gzigs/ mngon shes lnga thob bo/ /lo chen rin chen bzang po ni/ rigs kha che'i g.yu ri g.yu sgra bya ba/ yab gzhon nu dbang phyug yum cog ro kun bzang shes rab brtan ma/ lcam sring bzhi yod pa'i gcen shes rab dbang phyug gi gcung rin chen dbang phyug tu sku skye ba bzhes/ dgung lo bcu gsum la mkhan po legs pa bzang po las rab tu byung ste/ mtshan rin chen bzang por gsol/ de'i mod la 'dul ba rgya cher 'grel thugs su chud/ de nas rgyal po'i bkas kha cher byon/ lo tsA mkhas par bslabs/ paNDi ta ka ra rnam gsum sogs rgya gar gyi paN grub du ma la gtugs/ theg pa mtha' dag gi chos la sbyangs/ bstan pa la bya ba cher mdzad/ a ti sha dang pu rangs su mjal te/ gu ge khri thang pas mdzad pa'i lo chen gyi rnam thar las/ dgung lo brgyad cu rtsa bdun la mjal bar gsungs/