[A:༤༨ན] ཇི་ལྟར་མཇལ་བའི་ཚུལ་སོགས་ནི་གོང་དུ་བཤད་པ་ལྟར་ཡིན་ལ། གཞན་ཡང་ཡོ་ག གསང་འདུས། བདེ་མཆོག་སོགས་ཀྱི་དབང་དང་རྒྱུད་ཀྱི་བཤད་པ། མན་ངག་སོགས་ཐེག་པ་གོང་འོག་གི་ཆོས་མཐའ་དག་གིས་ཐུགས་ཚིམ་པར་མཛད། རྡོ་རྗེ་རྣལ་འབྱོར་མའི་བྱིན་རླབས་གནང་བས་རྟོགས་པ་ཁྱད་པར་ཅན་འཁྲུངས་པས་ལྷག་པར་དད་དེ། ལྷ་རྟེན་དང་དཔེ་མ་གཏོགས་པ་གང་ཡོད་ཕུལ། ཇོ་བོས་དབུས་སུ་ལོ་ཙཱ་ལ་འགྲོ་དགོས་གསུངས་པས། ང་རྒས་པས་མི་ནུས་ཞུས། འོ་ན་སྒྲུབ་པ་བགྱིས་གསུངས་པས་མཉེས་ཏེ། ལོ་ཙཱ་བ་ཆེན་པོ་ལ་པཎྜི་ཏའི་བླ་མ་དྲུག་ཅུ་ཡོད་ཀྱང་། ཇོ་བོ་ཉིད་མ་གཏོགས་པ་གཞན་རྣམས་ཀྱིས་སྒྲུབ་པ་ལ་མ་ཆུད། དེ་ནས་ལོ་ཙཱ་བས་སྒོ་གསུམ་རིམ་དུ་བྱས་པ་ལ། དམ་བཅའ་བའི་ཡི་གེ་གསུམ་བྲིས་ཏེ་སྒྲུབ་པ་མཛད་པས། གསང་འདུས་དང་བདེ་མཆོག་གི་ཞལ་གཟིགས། དགུང་ལོ་དགུ་བཅུ་རྩ་བརྒྱད་ལ་དགུན་ཟླ་ཐ་ཆུང་གི་ཚེས་བཅུ་བདུན་སྐར་མ་རྟ་པ་ཡོད་པའི་ཉིན་མཁའ་སྤྱོད་དུ་གཤེགས་པར་གུ་གེ་ཁྲི་ཐང་པས་གསུངས་སོ། །རྒྱ་བརྩོན་སེང་གཙང་སྟག་ཚལ་དུ་འཁྲུངས། རྟེན་དགེ་བསྙེན་ཟེར་ཏེ་ཕྱིས་རབ་ཏུ་བྱུང་བ་མཛད། རྒྱ་གར་དུ་ཇོ་བོ་ལ་ཆོས་མང་དུ་གསན། འཇམ་དབྱངས་ཀྱི་སྤྲུལ་པར་ཆོས་ཀྱི་འབྱུང་གནས་སུ་བཤད་ཅིང་བལ་པོར་སྐུ་གཤེགས། ལོ་ཙཱ་བ་ནག་ཚོ་ནི། ཡུལ་གུང་ཐང་། གདུང་ནག་ཚོ། མཚན་ཚུལ་ཁྲིམས་རྒྱལ་བ། འདུལ་བ་འཛིན་པར་གྲགས། རྒྱ་བརྩོན་སེང་ལ་མངོན་པ་མཁས་པར་བསླབས། དགུང་ལོ་ཉེར་བདུན་ལ་རྒྱ་གར་དུ་ཇོ་བོ་ཆེན་པོ་སྤྱན་འདྲེན་