[A:༤༩ན]བསྒྱུར། དེ་ནས་ཡོ་ག་རྣམས་གསུངས་ཏེ་བོད་དུ་ཇོ་བོའི་ཡོ་གའི་འཁོར་འདུས་པ་དང་པོ་ལོ་ཆུང་ལེགས་ཤེས་ཡིན་གསུངས། ལོ་ཙཱ་བ་དགེ་བློ་ནི། ལོ་ཆེན་གྱི་སློབ་མ་རིག་པ་ཅན་གྱི་ཁྱེའུ་ལྔའི་ནང་ནས། གཉིས་ཁ་ཆེར་ཚད་པས་གྲོངས། གསུམ་ནི་སྨྲ་ལོ་ཙཱ་བ་དགེ་བའི་བློ་གྲོས། མང་ཝེར་གྱི་ལོ་ཙཱ་བ་བྱང་ཆུབ་རྩེ་མོ། ལྗང་ལོ་ཙཱ་བ་རིན་ཆེན་གཞོན་ནུ་དང་གསུམ་ལས། འདི་ཉིད་དང་པོ་སྟེ། ལོ་ཆེན་ལ་མཁས་པར་སྦྱངས། ཇོ་བོ་ཆེན་པོའི་དྲུང་དུ་ཆོས་མང་དུ་ཞུས་ཡུན་རིང་དུ་བསྟེན། ལམ་སྒྲོན་སོགས་འགྱུར་མང་དུ་མཛད་དོ། །གོ་མི་སྒོམ་ཆེན་ནི། ཇོ་བོ་ལ་ལོ་ཆེན་གྱི་རྣལ་འབྱོར་རྒྱུད་ཀྱི་སྐོར་གསན་པའི་དུས་སུ་སྦྱོང་རྒྱུད་དང་། གཙུག་དགུའི་དབང་དང་། རྒྱུད་ཀྱི་བཤད་པ་སོགས་གསན་ཏེ་ད་ལྟ་ཡང་གོ་མི་ནས་བརྒྱུད་པ་ཀུན་རིག་སོགས་བསྣུར་ལུགས་སུ་གྲགས་པ་རྣམས་སོ། གཟུས་རྡོ་རྗེ་རྒྱལ་གྱིས་དང་པོར་ཀླུ་མེས་ཅན་དུ་བྱོན་ཏེ་མདོ་རྩ་འགྲེལ་པ་དང་བཅས་པ་སོགས་འདུལ་བའི་གཞུང་རྣམས་ལ་མཁས་པར་སྦྱངས། དེ་ནས་ཇོ་བོའི་དྲུང་དུ་ཐེག་པ་ཆེ་ཆུང་གི་ཆོས་མང་དུ་གསན་ཏེ། ངས་བསླབས་པའི་ཆོས་ཐམས་ཅད་ཀྱང་ལམ་དུ་སོང་གསུངས། འདི་ལ་བུ་ཆེན་བཞི་སྟེ། སྟོད་དུ་ཞང་ཞུང་པ་རྒྱལ་བའི་ཤེས་རབ། འཛིམ་པུ་གཞོན་ཚུལ། དབུས་སུ་འབྲོམ་སེང་དཀར། བསྟོད་པ་ཡེ་ཤེས་བླ་མ། དེ་རྣམས་ཀྱི་སློབ་མ་རྒྱ་འདུལ་འཛིན་ཡིན་ལ། འདིས་དགུང་ལོ་བརྒྱད་ཅུ་རྩ་ལྔ་བཞུགས། གྲྭ་བ་འདུལ་བའི་བཤད་ཉན་ཕེར་བ་སྟོང་ཕྲག་ལྷག་པ་སོགས་བྱུང་སྟེ། བོད་དུ་འདུལ་བའི་བཤད་གྲྭ་རྣམས་དང་། འདུལ་འཛིན་གསེར་རིའི་ཕྲེང་བ་ལྟ་བུ་བྱོན་པ་རྣམས་