[A:༤༨བ]དུ་བྱོན། ལོ་བཅུ་དགུའི་བར་ཚུལ་བཞིན་དུ་བསྟེན། ཐུན་མོང་གི་ཡོན་ཏན་རྣམས་རྫོགས་པར་མཛད། ནག་ཚོ་སྙེ་ཐང་ནས་མངའ་རིས་སུ་འབྱོན་ཁར། ཇོ་བོས་བསླབ་བྱ་མང་དུ་མཛད་དེ། དམ་ཚིག་གསུམ་བཀོད་ཀྱི་སྐུ་ཕྱག་ཏུ་བཟུང་ནས་བྱིན་རླབས་མཛད། འདུལ་བ་མདོ་རྩ་དང་། གསང་བ་འདུས་པའི་རྒྱ་དཔེ་དང་། འགྲོ་ཆོས་སུ་ཐུན་མོང་མ་ཡིན་པའི་སྤྱན་རས་གཟིགས་ཀྱི་སྒྲུབ་སྐོར་སོགས་སྦས་ཆོས་ཉི་ཤུ་གནང་སྟེ་ལུང་བསྟན་མང་དུ་མཛད། ཇོ་བོ་རང་གི་སྐུ་མཐེ་བོང་ཙམ་སེང་ལྡེང་ལ་བྲིས་ཏེ་གའུར་བཅུག་ནས་གུང་ཐང་པའི་དཔུང་པ་ལ་བཏགས། མཉེས་མཉེས་རྒྱ་ཆེར་མཛད། ཇོ་བོ་ལ་གུང་ཐང་པས་ཀྱང་ལན་གསོལ་ཏེ་ཕྱི་བཞག་རྣམས་འབྲོམ་ལ་བཞག རྣལ་འབྱོར་པས་ཀྱང་ནག་ཚོ་ལ་བསླབ་བྱ་ཇི་ལྟར་མཛད་པའི་ཚུལ་རྣམས། སྙེ་ཐང་དུ་མཛད་པའི་ཞུ་ལན་དང་། རྣལ་འབྱོར་པའི་བསྟོད་ཡིག་ཏུ་གྲགས་པར་གསལ་ལོ། །དེ་ནས་མངའ་རིས་སུ་བྱོན་ནས་ལུང་བསྟན་པ་བཞིན་སྒྲུབ་པ་མཛད་པས། འཇམ་དཔལ་རྡོ་རྗེ། སྒྲོལ་མ། ཡི་གེ་དྲུག་པ་རྣམས་ཞལ་གཟིགས། མངོན་ཤེས་ཀྱང་མངའ་ལ། དེ་ལས་སློབ་བརྒྱུད་ཕྱག་སོར་བ་སོགས་བྱོན་ཚུལ་འོག་ཏུ་འཆད་དོ། །ལོ་ཆུང་ལེགས་ཤེས་ནི་འཁྲུངས་ཡུལ་མངའ་རི་པུ་ཧྲང་པ། བལ་པོར་ཐང་བི་ཧ་ར་བྱ་བ་རྒྱལ་པོས་བཞེངས་པའི་གཙུག་ལག་ཁང་དུ་རྔོག་རིན་ཆེན་རྒྱལ་མཚན་གྱིས་ཞུས་སྣ་བྱས་ཏེ་མཇལ། རྡོ་རྗེ་འབྱུང་བ། གཙུག་དགུ། ཁམས་གསུམ་རྣམ་རྒྱལ་གྱི་དཀྱིལ་ཆོག་བསྟོད་འགྲེལ་དང་བཞིའི་རྒྱ་དཔེ། གསང་འདུས་ཀྱི་ཆོས་སྐོར་ཞུ་བའི་རྟེན་དུ་ཕུལ་ནས། ཇོ་བོ་དང་། ལོ་ཙཱ་བས་