[A:༥༠ན]མ་རྒྱུད་ཀྱི་ཀ་བ་ཚུགས་པ་བཞི། མན་ངག་གི་གདུང་ཐེག་པ་བརྒྱད། ལས་ཚོགས་དང་འཕྲིན་ལས་ལ་མཁས་པ་ལྕམ་དང་གྲལ་མ་ལྟར་དཔག་ཏུ་མེད་པ་བྱོན་ནོ། །ཡོལ་ཆོས་དབང་ནི། སྐུ་མཆེད་གསུམ་སྟེ། ཡོལ་དྲང་སྲོང་། ཡོལ་ཐོག་འབེབས་དང་གསུམ་ཀ་ཇོ་བོའི་དངོས་སློབ་ཏུ་གཏོགས་པ་ཡིན་ཡང་། འདིར་དང་པོ་སྟེ། ཇོ་བོ་གཙང་ཉང་ཚོ་གནས་སུ་ཕེབས་དུས། ཇོ་བོའི་ཞལ་ནས། ད་ནངས་ཐོ་རངས་ནམ་མཁའ་ལ་ཧྲིཿདཀར་པོ་སྒྲ་དང་བཅས་པ་ཅིག་བྱུང་། བཅུ་གཅིག་ཞལ་གྱི་སྐུ་ལི་མ་འདི་ལ་ཕོག དེ་ལས་འོད་འཕྲོས་བོད་ཐམས་ཅད་འོད་ཀྱིས་ཁྱབ་ནས་འོད་དེ་བན་ཆུང་གཞོན་ནུ་ཞིག་ལ་ཕོག་པས། དེའི་སྒྱུ་ལུས་འོད་གསལ་དུ་ཤར་བ་རྨིས་གསུངས། ཉི་མ་རྩེ་ཤར་ལ་ཡོལ་ཆོས་དབང་བཙུན་ཆུང་ལོ་བཅུ་དྲུག་ལོན་པ་གཅིག་གིས་དར་དང་གསེར་ཕུལ། བདག་ལ་ཐུགས་རྗེ་ཆེན་པོའི་གདམ་ངག་ཞིག་ཞུ་ཟེར་བས། ཇོ་བོ་དགྱེས་ནས་བཅུ་གཅིག་ཞལ་གྱི་སྐུ་དེ་ཡང་གནང་། སྤྱན་རས་གཟིགས་དང་། རྟ་མགྲིན་སོགས་ཀྱི་ཆོས་སྐོར་རྣམས་སྔ་ཕྱིར་རྫོགས་པར་གནང་། ཐུགས་རྗེ་ཆེན་པོ་ཞི་ཁྲོ་མང་དུ་ཞལ་གཟིགས་ཏེ་དངོས་གྲུབ་བརྙེས་སོ། །གཞན་ཡང་སྟོད་ལུང་གནམ་གྱི་རྫིང་ཁ་བ། མལ་ཤེས་རབ་སེམས་པས་ཇོ་བོ་ལ་ཡུན་རིང་དུ་བསྟེན་ཏེ། བསྒོམས་པས་སྨིན་མཚམས་ནས་འོད་ཟེར་བྱུང་། དེའི་རྗེས་སེམས་བཅུག་ནས་བསྒོམས་པས་ཞིང་ཁམས་མང་པོ་མཐོང་བ་བྱུང་སྟེ། ཇོ་བོ་ལ་ལམ་དུ་འགྱུར་རམ་ཞུས་པས། ཞི་གནས་ཀྱི་ཆ་མཐུན་ཡིན། བླ་མ་མཚན་ཉིད་དང་ལྡན་པས་ཟིན་ན་ལམ་དུ་འགྱུར་གསུངས། ཡང་ལན་ཅིག་སྙེ་ཐང་ན། ཇོ་བོའི་གཟིམ་ཆུང་དུ་ཁོང་