[A:༥༠བ]རྟོགས་པ་འབུལ་བ་ལ། ཁུ་སྟོན་གྱིས་ལྐོག་ཉན་བྱས་པས། ས་ཐོབ་པ་ཙམ་དུ་མངོན་ཏེ། ཁོང་ཕྱིར་བྱུང་བའི་རྗེས། ཁུ་སྟོན་གྱིས་ཇོ་བོ་ལ། དེ་སུ་ལགས། རྟོགས་པ་ཇི་ཙམ་དུ་འདུག་ཞུས་པས། མལ་ཤེས་རབ་སེམས་དཔའ་བྱ་བ་ཐེག་པ་ཆེན་པོའི་སྦྱོར་ལམ་དྲོ་ལ་ཉེ་བར་འདུག་གསུངས། དེ་གར་སོང་ཞུས་པས། ཁོ་རྐང་མགྱོགས་ཀྱི་དངོས་གྲུབ་ཐོབ་པས་རླུང་ཤོད་ངར་གྱི་ལ་ལ་སླེབས་སོང་། རང་སྒྲེང་ལ་འགྲོ་བར་འདུག་གསུངས། འདིས་སྟོད་ལུང་ཚ་ཐོག་གི་དགོན་པ་བཏབ་སྟེ། སྤྱན་སྔའི་རབ་བྱུང་མཛད་པའི་མཁན་པོ་ཡིན་ནོ། །དབུས་ནས་ཁུ་རྔོག་འབྲོམ་གསུམ་གྲགས་ཆེ་བས་དེ་རྣམས་ཀྱི་ལོ་རྒྱུས་འོག་ཏུ་འཆད་ལ། གཞན་ཡང་རྔོག་བྱང་ཆུབ་འབྱུང་གནས། རླན་ཡེ་ཤེས་ཤེས་རབ། ཞང་སྣ་ནམ་རྡོ་རྗེ་དབང་ཕྱུག་གསུམ་ལ། ཐེག་ཆེན་གདུང་རྒྱུད་རྟེན་མཛད་གསུམ་དུ་གྲགས། ཀ་བ་སྟོན་པ་ཤཱཀྱ་དབང་ཕྱུག རག་ཤི་སྟོན་པ་ཚུལ་ཁྲིམས་གཞོན་ནུ། རྨ་སྟོན་པ་ཤཱཀྱ་བྱང་ཆུབ། དར་སྟོན་པ་བྱང་ཆུབ་དཔལ། སྦ་སྟོན་པ་གཡུ་རུང་རིན་ཆེན། གར་མི་སྟོན་པ་ཡོན་ཏན་གཡུ་རུང་། རྒྱུས་སྟོན་པ་ཆོས་ཀྱི་རྒྱལ་པོ། བང་སྟོན་ཆོས་ཀྱི་རྒྱལ་མཚན། འདང་འཇང་སྟོན་པ། ཞང་སྣ་ཆུང་སྟོན་པ། ལྷབ་མི་སྟོན་པ་ཤེས་རབ་འོད་ཟེར་ཏེ་དབུས་ཀྱི་སྟོན་ཆེན་བཅུ་གཅིག་གོ །ཞང་བཙུན་ཡེར་པ་བ་ཡེ་ཤེས་འབར། ས་ཕུག་པ་ཞུ་སྒོམ། མཁའ་རུ་བ་ཆེན་པོ་གྲགས་པ་སྔ་མ་སྟེ་སྒྲུབ་པ་རྩེ་གཅིག་ཏུ་མཛད་པ་གསུམ་མོ། །གཞན་ཡང་རྔོག་སྒོམ་ཡོན་ཏན་རྒྱལ་པོ། སྒོམ་པ་དད་པ་བླ་མ། རྣལ་འབྱོར་པ་གཡུང་དྲུང་རྒྱལ་མཚན། སུམ་པ་མཐུ་ཆེན། སྒྲོ་ཨརྻ་བྱང་ཆུབ། ཁུ་སེངྒེ་