[A:༡༥ན]འགོས་ཀྱི་སྟོང་ཐུན་ཆེན་མོར་ཡང་ལུང་དྲངས་ཤིང་ཚད་ལྡན་དུ་མཛད། ཁ་ཆེ་པཎ་ཆེན་མ་བྱོན་གོང་དུ་འཕགས་ལུགས་ཀྱི་དབང་བཀའ་མཛད་པ་ཐམས་ཅད་དཀྱིལ་ཆོག་དེ་ཉིད་ལ་བརྟེན་པ་ཤ་སྟག་ཡིན་པའི་ཕྱིར། གཉིས་པ་ལྟར་ན་དེའི་ངོས་འཛིན་བྱ་དགོས་སོ། །འོན་ཀྱང་བུ་སྟོན་གྱིས་དཔྱད་པ་དེ་ལྟར་མཛད་པ་ཡང་ཧ་ཅང་མི་ལེགས་པ་མ་ཡིན་ཏེ། དེང་སང་ཡོངས་སུ་གྲགས་པའི་བོད་དུ་འགྱུར་བའི་དཀྱིལ་ཆོག་ཉི་ཤུ་པ་འདི་ཀླུ་སྒྲུབ་ཀྱིས་མཛད་ངེས་ཤེས་ཡིན་ན། སློབ་དཔོན་གྱི་དངོས་སློབ་ཀླུ་བྱང་གིས་དེའི་རྗེས་སུ་དེ་དང་མི་མཐུན་པ་འདི་མཛད་དོན་མེད་པ་ཙམ་དུ་སྣང་བའི་དོགས་པ་འཇུག་ཏུ་རུང་བས་སོ། །ཡང་རེད་མདའ་བ་གསུངས་པ་དེ་ངོ་ཐོག་ནས་བལྟས་ན་འཐད་པ་ལྟར་སྣང་ཡང་། དོན་ལ་ཅུང་ཟད་མི་འགྲིག་སྟེ། ཇི་ལྟར་ཞེ་ན། ཀླུ་བྱང་གིས་མཛད་པའི་དཀྱིལ་ཆོག་ཉི་ཤུ་པ་འདི་རྒྱ་བོད་ཀྱི་མཁས་གྲུབ་གང་གིས་ཀྱང་རྣམ་དག་ཏུ་བཞེད་པའི་ངེས་པ་མེད་པར། ཀླུ་བྱང་གིས་མཛད་པར་གྲགས་པ་ཙམ་ཞིག་ཀ་ཡིན་ན། རེད་མདའ་བ་ཆེན་པོས་དཔོན་སློབ་གཞུང་འགལ་ན། སློབ་མའི་གཞུང་ཐེ་ཚོམ་ཅན་དུ་བྱེད་རིགས་ཀྱི། སློབ་དཔོན་གྱི་གཞུང་ཐེ་ཚོམ་ཅན་དུ་བྱེད་མི་རིགས་སོ་གསུངས་བ་འདི། བུ་སྟོན་གྱི་བཞེད་པ་ལ་གནོད་བྱེད་ངེས་ཤེས་ཀྱི་དགག་པར་འདུག་ནའང་། ཀླུ་བྱང་གི་འདི་ནི་རྒྱ་གར་གྱི་པཎ་གྲུབ་མང་པོས་ཚད་ལྡན་དུ་ཞལ་གྱིས་བཞེས་པས་རེད་མདའ་བའི་དགག་པ་དེ་ཡང་འཐད་ཕྱོགས་མིན་ནོ། །ཡང་རང་ལུགས་ཀྱི་མཁས་པ་འགའ་རེས་ཀླུ་སྒྲུབ་ཀྱི་འདི་རྣམ་དག་མིན་པའི་ཤེས་བྱེད་ལ། སློབ་དཔོན་གྱིས་མཛད་ངེས་པ་ཡིན་ན། སློབ་དཔོན་སྒྲ་གཅན་འཛིན་དཔལ་བཤེས་