[A:༡༥བ]གཉེན་ཟུང་འཇུག་གསལ་བར་འདི་ནས་ལུང་འདྲེན་མཛད་རིགས་པ་ལས། འདི་ནས་མ་མཛད་པར་ཀླུ་བྱང་གི་དཀྱིལ་ཆོག་ཉི་ཤུ་པ་ནས་ལུང་འདྲེན་དང་ཁ་འཕང་མཛད་པའི་ཕྱིར་གསུངས་མོད་ཀྱང་། དེ་ལ་རང་ངེས་པ་ཆེར་མེད་དམ་སྙམ་སྟེ། ཀླུ་སྒྲུབ་ཀྱི་དཀྱིལ་ཆོག་ཤིན་ཏུ་བསྡུས་པ་ཞིག་མཛད་པ་ཡིན་ནས་ལུང་དུ་འདྲེན་འོས་ཀྱང་ཆེར་མེད་པ་དང་། ཁྱད་པར་ཁ་འཕང་མཛད་པ་ནི་ཡེ་ཤེས་དབབ་པའི་སྐབས་ན་འདུག་པས། དེ་ཉིད་དཀྱིལ་ཆོག་ཀླུ་སྒྲུབ་ཀྱིས་མཛད་པ་དེར་ཤིན་ཏུ་བསྡུས་པ་ལྟ་བུའི་ཁ་མ་འཕངས་ཤིང་། ཀླུ་བྱང་གི་དཀྱིལ་ཆོག་དེར་ཡེ་ཤེས་དབབ་པ་རྒྱས་པར་ཡོད་ནས་དེ་ལ་ཁ་འཕངས་པ་ཡིན་པ་ཡང་སྲིད་པས་སོ། །དེས་ན་མཁས་པའི་དབང་པོ་གུང་རུས་གསུངས་པ་ལྟར། ཀླུ་བྱང་གིས་མཛད་པའི་དཀྱིལ་ཆོག་ཉི་ཤུ་པ་ནི། སློབ་དཔོན་སྒྲ་གཅན་འཛིན་དཔལ་སོགས་པཎ་གྲུབ་མང་པོས་ཚད་ལྡན་དུ་བཞེད་པས་རྣམ་དག་ཡིན་མིན་ལ་རྩོད་པ་ཆེན་པོ་མེད་ལ། ཀླུ་སྒྲུབ་ཀྱིས་ཀྱང་དཀྱིལ་ཆོག་ཉི་ཤུ་པ་ཞིག་མཛད་དམ་སྙམ་སྟེ། འགོས་སོགས་སྔ་རབས་པ་མང་པོས་ཀླུ་སྒྲུབ་ཀྱིས་མཛད་པའི་དཀྱིལ་ཆོག་དེ་ཡོད་པ་རང་བཞེད་ནས། དེ་ལ་བརྟེན་པའི་དབང་བཀའ་ཡང་མཛད་པ་ལ། ཕྱིས་སུ་དབང་བཀའ་རྙིང་མར་གྲགས་པ་དང་། ཁྱད་པར་འགོས་ལོས་རྒྱ་གར་དུ་བྱོན་ནས་བླ་མ་བཙུན་མོ་ཅན། མངོན་ཤེས་ཅན། ནག་པོ་པ་དང་གསུམ་བསྟེན་ནས་གསང་བ་འདུས་པ་མཐིལ་ཕྱིན་པར་གསན་པ་ཡོངས་ལ་གྲགས་པས། དཀྱིལ་ཆོག་དེ་སློབ་དཔོན་ཀླུ་སྒྲུབ་ཀྱིས་མ་མཛད་པ་དགོངས་བཞིན་དུ་དེ་རྣམ་དག་ཏུ་ཞལ་གྱིས་བཞེས་པ་མི་སྲིད་པས་སོ། །དེས་ན་བུ་སྟོན་གྱི་