[A:15a]'gos kyi stong thun chen mor yang lung drangs shing tshad ldan du mdzad/ kha che paN chen ma byon gong du 'phags lugs kyi dbang bka' mdzad pa thams cad dkyil chog de nyid la brten pa sha stag yin pa'i phyir/ gnyis pa ltar na de'i ngos 'dzin bya dgos so/ /'on kyang bu ston gyis dpyad pa de ltar mdzad pa yang ha cang mi legs pa ma yin te/ deng sang yongs su grags pa'i bod du 'gyur ba'i dkyil chog nyi shu pa 'di klu sgrub kyis mdzad nges shes yin na/ slob dpon gyi dngos slob klu byang gis de'i rjes su de dang mi mthun pa 'di mdzad don med pa tsam du snang ba'i dogs pa 'jug tu rung bas so/ /yang red mda' ba gsungs pa de ngo thog nas bltas na 'thad pa ltar snang yang / don la cung zad mi 'grig ste/ ji ltar zhe na/ klu byang gis mdzad pa'i dkyil chog nyi shu pa 'di rgya bod kyi mkhas grub gang gis kyang rnam dag tu bzhed pa'i nges pa med par/ klu byang gis mdzad par grags pa tsam zhig ka yin na/ red mda' ba chen pos dpon slob gzhung 'gal na/ slob ma'i gzhung the tshom can du byed rigs kyi/ slob dpon gyi gzhung the tshom can du byed mi rigs so gsungs ba 'di/ bu ston gyi bzhed pa la gnod byed nges shes kyi dgag par 'dug na'ang / klu byang gi 'di ni rgya gar gyi paN grub mang pos tshad ldan du zhal gyis bzhes pas red mda' ba'i dgag pa de yang 'thad phyogs min no/ /yang rang lugs kyi mkhas pa 'ga' res klu sgrub kyi 'di rnam dag min pa'i shes byed la/ slob dpon gyis mdzad nges pa yin na/ slob dpon sgra gcan 'dzin dpal bshes