[A:༢༩ན] རྨི་ལམ་དུ་མཁའ་འགྲོ་མས་ཁྱོད་དེ་ལྟ་བུའི་ཐེག་པའི་མཆོག་འདོད་ན། འདི་ནས་བྱང་ཕྱོགས་ན་དཔལ་ཨུ་རྒྱན་གྱི་གནས་ཞེས་བྱ་བར་ཧེ་རུ་ཀ་རང་བྱུང་གི་ལྷ་ཁང་ན་དཔལ་གསང་བ་འདུས་པ་ལ་སོགས་པའི་རྒྱུད་སྡེ་རིན་པོ་ཆེ་རྣམས་ཡེ་ཤེས་ཀྱི་མཁའ་འགྲོ་མ་རྣམས་ཀྱིས་བདག་བྱས་ནས་ཡོད་པས་དེར་སོང་ལ་ཞུས་ཤིག་ཅེས་ལུང་བསྟན་ནོ། །དེར་རྒྱལ་པོས་དཔལ་ཨུ་རྒྱན་གྱི་གནས་སུ་བྱོན་ཏེ་ཧེ་རུ་ཀ་རང་བྱུང་གི་ལྷ་ཁང་གི་སྒོ་བཞི་ནས་རིམ་པ་བཞིན་ཕྱག་བྱས། སླར་ཡང་ཤར་སྒོ་ནས་ཕྱག་བྱས་གསོལ་བ་བཏབ་པའི་རྗེས་སུ་བུད་མེད་གཅིག་བྱུང་ནས། ཁྱོད་རྒྱལ་པོ་བི་སུ་ཀལྤ་ཡིན་ནམ་གསུངས། ཡིན་བྱས་པས། ལྷ་ཁང་གི་ནང་དུ་ཁྲིད་གསང་བ་འདུས་པའི་དཀྱིལ་འཁོར་དུ་མངོན་སུམ་དུ་བཅུག དབང་བསྐུར། རྒྱུད་བཤད། གདམས་པ་དང་རྗེས་སུ་གདམས་པ་མཐའ་དག་གནང་ནས་གླེགས་བམ་གཏད་དོ། །སྤྱིར་ཨོ་རྒྱན་དུ་ལ་ལས་དབང་དང་ལུང་ཐོབ་ཀྱང་རྒྱུད་མ་ལོན་པ་དང་། ལ་ལས་རྒྱུད་ལོན་ཀྱང་དབང་དང་ལུང་མ་ཐོབ་པ་ཡོད་ནའང་། རྒྱལ་པོ་འདིས་ཐམས་ཅད་དུས་གཅིག་ལ་ལོན་པ་ཡིན་ལ། དེ་ནས་རྒྱལ་པོ་དེས་གསང་བ་འདུས་པའི་དོན་བསྒོམས་པས་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་ནས་རྒྱུད་རྣམས་ཁྱེར་ཏེ་འཕགས་ཡུལ་དུ་བྱོན་པས། དེའི་ཚེ་འཕགས་ཡུལ་གྱི་ཡུལ་ར་ཌའི་བྲམ་ཟེ་ཞིག་ལ་སྲས་བཞི་ཡོད་པ་ལས། དེ་དག་གིས་གཞོན་ནུའི་དུས་སུ་སྒྲའི་བསྟན་བཅོས་ལ་སོགས་པ་རིག་པའི་གནས་ལ་ལེགས་པར་སྦྱངས། ཕྱིས་བསྟན་པ་ལ་དད་པར་གྱུར་པ་དང་། དེའི་ནང་ནས་གཅིག་བཅོམ་ལྡན་འདས་ཀྱི་སྲས་སྒྲ་གཅན་འཛིན་བཟང་པོའི་དྲུང་