[A:༢༩བ]དུ་རབ་ཏུ་བྱུང་བའི་མཚན་ཡང་སྒྲ་གཅན་འཛིན་བཟང་པོར་བཏགས། དེས་ཕྱིའི་སྡེ་སྣོད་ལ་ལེགས་པར་སྦྱངས་པས་མཁས་པ་ཆེན་པོར་གྱུར་ཏེ། བི་ཀ་མ་ལ་ཤཱི་ལའི་མཁན་པོ་མཛད་ཅིང་བཞུགས་པ་ལས། རྒྱལ་པོ་བི་སུ་ཀལྤ་ཞེས་བྱ་བས་ཨོ་རྒྱན་ནས་མཁའ་འགྲོ་མ་རྣམས་ལས་གསང་སྔགས་ཟབ་མོའི་ཆོས་ལོན་ཡོད་ཟེར་བ་ཐོས་ནས་དད་དེ། དེའི་དྲུང་དུ་སོང་ཞིང་ཞུས་པས། དེས་ཀྱང་གསང་བ་འདུས་པའི་དཀྱིལ་འཁོར་དུ་བཅུག དབང་བསྐུར། རྒྱུད་བཤད། གདམས་པ་དང་རྗེས་སུ་བསྟན་པ་མ་ལུས་པ་གནང་། བྲམ་ཟེ་དེས་ཀྱང་དོན་ཉམས་སུ་བླངས་པས་བསྐྱེད་རྫོགས་ཀྱི་དོན་ལ་བརྟན་པ་ཅུང་ཟད་ཐོབ་པ་དང་། དེ་མཐར་ཕྱིན་པར་བྱ་བའི་ཕྱིར་རབ་བྱུང་གི་ཆ་ལུགས་སྦས་ཏེ་སྤྱོད་པ་ལ་གཤེགས་སོ། །དེའི་ཚེ་མདའ་འཕེན་པའི་སྤྱོད་པ་མཛད་དེ། མདའ་ལེགས་པར་བསྲངས་ན་གནད་དུ་འཕོག་པ་བཞིན་དུ། སེམས་ཉིད་གནས་ལུགས་ཀྱི་སྟེང་དུ་སྲོང་ན་གྲོལ་བར་རྟོགས་ནས་རྟོགས་པ་མཆོག་བརྙེས་སོ། །དེའི་ཚེ་ས་ར་ཧ་ཞེས་པར་མཚན་གྲགས། དེ་ཡང་མདའ་བསྣུན་ཞེས་པ་ཡིན་ལ། གྲུབ་ཆེན་དེས་རང་གི་རྟོགས་པ་གླུར་བླངས་པ་དོ་ཧ་མཛོད་མཛད། དེ་ཡང་སྤྱིར་དོ་ཧ་ལ་རྒྱལ་པོ་དོ་ཧ། བཙུན་མོ་དོ་ཧ། དམངས་དོ་ཧ་དང་གསུམ་ལས། དེ་གསུམ་ཆར་སློབ་དཔོན་འདིས་མཛད་པར་གྲགས་ཀྱང་། གཞན་གཉིས་ནི་བལ་པོའི་པཎྜི་ཏ་ཞིག་གིས་བྱས་པ་སློབ་དཔོན་འདི་ལ་ཁ་འཕངས་པ་ཡིན་པར་གྲགས་ལ། འདིས་མཛད་པའི་དོ་ཧ་ནི་དམངས་དོ་ཧར་གྲགས་ལ། སེམས་ཉིད་གཅིག་པུ་ཀུན་གྱི་ས་བོན་ཏེ། །ཞེས་པ་ཡོད་པ་དེ་ཡིན་པར་བཤད་དོ། །དེ་ལྟ་བུའི་