[A:༤༡བ]་པ་གནང་ཞིང་། འདིས་གསང་བ་འདུས་པའི་དཀྱིལ་ཆོག་ཉི་ཤུ་པ་སོགས་བསྟན་བཅོས་ཀྱང་འགའ་མཛད། མཐར་དཔལ་གྱི་རི་ལ་གཤེགས་ཏེ་དེང་སང་ཡང་བཞུགས་སོ། །ཡང་ཐུགས་སྲས་བཞིའི་ཤཱཀྱ་བཤེས་གཉེན་ནམ་ཤཱཀྱ་མི་ཏྲ་ནི་གོང་དུ་བསྟན་པ་ལྟར་རིམ་ལྔའི་རིམ་པ་གཉིས་པ་མཛད་མཁན་དེ་ཡིན། ཡོ་ག་བ་ཤཱཀྱ་བཤེས་གཉེན་བྱ་བ་དེ་དང་འདི་མི་གཅིག་སྟེ། ཡོ་ག་བ་དེས་ལེགས་ལྡན་འབྱེད་ཀྱི་ལུང་མང་པོ་དྲངས་ཤིང་འདི་ནི་ཀླུ་སྒྲུབ་ཀྱི་ཐུགས་ཀྱི་སྲས་མཆོག་ཏུ་གྱུར་པ་ཞིག་ཡིན་ལ། ལེགས་ལྡན་འབྱེད་ནི་ཀླུ་སྒྲུབ་ཀྱི་དངོས་སློབ་ཙམ་ཡིན་ཀྱང་། སྲས་ཀྱི་ཐུ་བོ་མིན་པས་དེའི་བསྟན་བཅོས་ནས་ལུང་འདྲེན་མཛད་པ་མི་འབྱུང་བས་སོ། །ཡང་སྤྱོད་བསྡུས་ལ་འགྲེལ་པ་མཛད་མཁན་གྱི་ཤཱཀྱ་བཤེས་གཉེན་བྱ་བ་གཅིག་བྱུང་བ་དེ་ཡང་འདི་དང་མི་གཅིག་ཅིང་། གསང་འདུས་ཡེ་ཤེས་ཞབས་ལུགས་པའི་བརྒྱུད་འཛིན་ཤཱཀྱ་བཤེས་གཉེན་ཟེར་བ་ཞིག་ཡོད་པ་དེ་དང་ཡང་དུས་མི་འགྲིགས་པས་མི་གཅིག་པར་བཤད་པ་ཡིན་ནོ། །ཡང་མ་ཏང་གི་པ་ནི་འཇིགས་པའི་དུར་ཁྲོད་དུ་བརྟུལ་ཞུགས་ཀྱི་སྤྱོད་པ་མཛད་པས་འཕགས་པ་སྤྱན་རས་གཟིགས་ཀྱི་ཞལ་གཟིགས། ཡུལ་ལས་མཚན་དུ་བཏགས་པ་ལ་རྣལ་འབྱོར་དབང་ཕྱུག་པཎ་ཏ་པ། རིགས་ཀྱི་སྒོ་ནས་མཚན་ཐོགས་པ་ལ་ཏིང་གོ་པ་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་ཀྱང་སྦས་པའི་བརྟུལ་ཞུགས་ལ་གནས་པ་གསང་མཚན་མཚན་གསང་བ་ཞེས་གྲགས་པ་ཞིག་ཡིན་པར་བཤད་པ་ཡིན་ནོ། །ཡང་ཉེ་སྲས་སངས་རྒྱས་བསྐྱང་ལེགས་ལྡན་འབྱེད་གཉིས་ནི་སློབ་དཔོན་འདིའི་དབུ་མའི་