[A:༤༤བ]པས་སོ། །ཞེས་སོགས་གསུངས་ན་ཟླ་གྲགས་ཀླུ་སྒྲུབ་ཀྱི་དངོས་སློབ་ཡིན་པ་ལྟ་བུ་ཞིག་བཞེད། ཡང་རྗེ་རྡོ་རྗེ་འཆང་ཀུན་དགའ་བཟང་པོའི་གསུང་རྒྱུན་གུང་རུས་འབྲི་བར་མཛད་པའི་གསང་འདུས་རྣམ་བཤད་ལས། འོ་ན་ཟླ་བ་གྲགས་པ་འདི་ཀླུ་སྒྲུབ་ཀྱི་དངོས་སློབ་ཡིན་ནམ་ཞེ་ན། འཕགས་པས་རྒྱལ་བུ་ལ་དབུ་སྦྱིན་པར་བཏང་རྗེས་ཞལ་མཇལ་བ་ལྟ་བུ་ལ་ནི་འགལ་བ་མེད་དེ། སངས་རྒྱས་མྱ་ངན་ལས་འདས་པའི་ཚུལ་བསྟན་པའི་རྗེས་སུ་ཞལ་མཇལ་བ་དང་། གྲུབ་ཆེན་ཀླུ་བྱང་ལྷོ་ཕྱོགས་དཔལ་གྱི་རི་ལ་ད་དུང་ཡང་ཚེའི་རིག་འཛིན་བརྙེས་ནས་བཞུགས་པ་སྐལ་ལྡན་རྣམས་དེང་སང་ཡང་ཞལ་མཇལ་བ་ཡིན་ནོ། །འཕགས་པས་དབུ་སྦྱིན་པར་མ་བཏང་གོང་དུ་དཔོན་སློབ་ཏུ་བྱས་ནས་འཆད་ཉན་བྱས་པའི་དཔོན་སློབ་ནི་མིན་ཏེ། ཟླ་གྲགས་འདི་ནཱ་རོ་པའི་བླ་མ་ཙནྡྲ་གོ་མི་དང་དུས་མཚུངས་སུ་བཤད་པ་དང་། ཟླ་གྲགས་ཀྱི་དུས་ན་ཨཱརྻ་དེ་བའི་སློབ་མ་གནས་བརྟན་ཆོས་སྐྱོང་སྟེ་བིརྺ་པ་ཡང་བྱོན་ཟིན་པར་བཤད་པ་དང་། ཀླུ་སྒྲུབ་དང་དེའི་དངོས་སློབ་ཕལ་ཆེར་ཡང་འདས་ཟིན་པར་ཟླ་གྲགས་རང་ཉིད་གསུངས་ཏེ་ཞེས་གསུངས་ནས། འཇུག་པ་རང་འགྲེལ་ནས་ལུང་འདྲེན་ཡང་མཛད་ཅིང་། སྲད་བུ་ཀུན་བློའི་གསང་འདུས་རྒྱུད་བཤད་སྔོན་འགྲོ་ཟིན་བྲིས་ལས། དངོས་སློབ་ཏུ་འདོད་པ་ལ་ལུང་རིགས་ཀྱི་གནོད་བྱེད་མང་དུ་བརྗོད་ནས་རང་གི་བཞེད་པ་ལ། དེས་ན་ཟླ་གྲགས་ཀྱིས་ཀླུ་སྒྲུབ་ཀྱི་ཞབས་དུས་ཀྱི་དབང་དུ་བྱས་ན་མ་ཟིན་པ་ཡིན་ལ། ཕྱིས་ཞལ་བསྟན་ནས་བྱིན་གྱིས་བརླབས་པ་ནི་མ་བཀག་གོ་ཞེས་གསུངས་པས། རྗེ་བཙུན་ཀུན་དགའ་བཟང་པོ་ཡབ་སྲས་རྣམས་ནི་དངོས་སློབ་མིན་པར་བཞེད་དོ། །གཉིས་པ་རང་ལུགས་འཐད་པའི་ཕྱོགས་ངོས་བཟུང་བ་ནི། དེ་ལྟར་