[A:༤༤ན]འདུས་སྒྲོན་གསལ་ལས། སངས་རྒྱས་ཀུན་གྱི་རིམ་གཉིས་གནས་ཀྱི་རྒྱས་བཏབ་དེ་ནི་ཀླུ་སྒྲུབ་ལས་རྙེད་པ། །ཁྱབ་བདག་དཔལ་ལྡན་རྡོ་རྗེ་སེམས་དཔར་བཏུད་དེ་ཟླ་བ་གྲགས་པས་རིམ་བཞིན་བཤད། །ཅེས་དང་། པཎྜི་ཏ་སྐལ་ལྡན་གྲགས་པས། དེ་ནི་དཔལ་ལྡན་ཀླུ་སྒྲུབ་ལས་རྙེད་པ་ཞེས་སྨོས་ཏེ། དེ་ནི་དཔལ་ལྡན་ཀླུ་སྒྲུབ་ཀྱི་ཞལ་སྔ་ནས་ཀྱི་དངོས་ཀྱི་སློབ་མ་ཉིད་དུ་སོ་སོར་སྟོན་གྱི་བརྒྱུད་པས་ནི་མ་ཡིན་ནོ་ཞེས་སོགས་བཤད་ཅིང་། དོ་ཧ་མཛོད་ཀྱི་ཊིཀྐ་འགའ་ཞིག་ལས་ཀྱང་། ཟླ་གྲགས་ཀྱིས་ཀླུ་སྒྲུབ་ལས་མན་ངག་དངོས་ཐོབ་ཅིང་། མཐར་ཀླུ་སྒྲུབ་ཀྱིས་དབུ་སྦྱིན་པར་བཏང་ནས་བདེ་བ་ཅན་དུ་གཤེགས་པའི་ཚེ། ནཱ་ག་བོ་དྷི། ཨཱརྻ་དེ་ཝ། ཟླ་གྲགས་གསུམ་གྱིས་གསོལ་བ་བཏབ་པས། སྐུ་ཅི་འདྲ་བའི་འོད་ཅིག་སྣང་བར་བྱས་ནས། གར་ཡང་མ་རྟོག་ཅིར་ཡང་མ་སེམས་པར། །བཅས་བཅོས་མེད་པའི་རང་བཞིན་ནལ་མར་ཞོག །མ་བཅོས་སྐྱེ་མེད་རང་རིག་བྱང་ཆུབ་སེམས། །དེ་ལྟར་རྟོགས་ན་སངས་རྒྱས་དེ་རང་ཡིན། །ཞེས་གསུངས་པའི་གདམས་པ་གནང་ཞེས་སོགས་དང་། དེའི་ཚེ་ཨཱརྻ་དེ་ཝས། འགྲོའོ་ཨཱརྻ་དེ་ཝ་འགྲོ། །འོད་ལུས་དག་པའི་ཞིང་དུ་འགྲོ། །སོང་ཅིག་ནཱ་ག་བོ་དྷི་སོང་། །རི་བྱ་རྐང་ཅན་དུ་འཕུར་ཏེ་སོང་། །སོང་ཅིག་ཟླ་བ་གྲགས་པ་སོང་། །དཔལ་གྱི་རི་ལ་ཐོགས་མེད་སོང་། །ཞེས་སོགས་གསུངས་ཤིང་། ཟླ་བ་གྲགས་པས་ཀྱང་། ཆད་དོ་ཟླ་བ་གྲགས་པ་ཆད། །ཀླུ་སྒྲུབ་གཤེགས་པས་ལམ་མཁན་རྒྱུན་ཐག་ཆད། །མ་བཅོས་སྐྱེ་མེད་ཆོས་ཀྱི་རྒྱུན་ཐག་ཆད། །ཡིད་ལ་མི་བྱེད་ཆོས་ཀྱི་རྒྱུན་ཐག་ཆད། །ཅེས་སྨྲས་ནས་དཔལ་ལྡན་འབྲས་སྤུངས་ཀྱི་རི་ལ་བཞུད་ཅེས་སོགས་བཤད་