[A:༤༦བ]པ་སོགས་ཀྱི་ཐུགས་ཀྱི་ངལ་བ་དེ་ལྟ་བུ་མི་མཛད་པར་ཟླ་གྲགས་ཀླུ་སྒྲུབ་ཀྱི་དགོངས་པ་སྐོང་བའི་སློབ་མ་ཡིན་གྱི། དུས་མཚུངས་ཀྱི་དངོས་སློབ་མ་ཡིན་ཞེས་བདག་ཉིད་ཆེན་པོ་ས་པཎ་གྱིས་གསུངས་པ་འདི་དང་རྗེས་སུ་མཐུན་པ་ཞིག་མཛད་པར་ཞུ་ཞེས་མཁས་དབང་ཁྱེད་ལ་ཐལ་མོ་སྦྱོར་རོ། །དེས་ན་ཟླ་གྲགས་ཀླུ་སྒྲུབ་ཀྱི་དངོས་སློབ་ཡིན་ན། ཟླ་གྲགས་ཉིད་ཀྱིས། བདེ་བ་ཅན་དུ་ཀླུ་སྒྲུབ་གཤེགས་པར་གྱུར་པ་དེས་མཛད་པའི། །གཞུང་མང་དང་ནི་སློབ་མའི་ཚོགས་དེ་དག་ཀྱང་དུས་ནམ་ཞིག་ན་ཉམས་པར་འགྱུར། །དེ་ཉིད་ཉི་མ་ནུབ་པས་དེང་སང་གཞུང་ལུགས་གསལ་པོ་དེ་ནི་གང་ནའང་མེད། །ཅེས་ཟླ་གྲགས་ཀྱི་དུས་ན་ཀླུ་སྒྲུབ་ཀྱི་སློབ་མའི་ཚོགས་རྣམས་ཀྱང་ཉམས་པ་སྟེ་འདས་ཟིན་ཅིང་། དེ་ཉིད་སློབ་མ་དང་བཅས་པ་གཤེགས་པས་ཟླ་གྲགས་ཀྱི་དུས་ན་གཞུང་ལུགས་གསལ་པོ་ཡང་མེད་གསུངས་པ་དང་། གཅིག་ནས་གཅིག་ཏུ་བརྒྱུད་ལས་འོངས་དང་བདག་གིས་རྣམ་ཕྱེ་ལས་རྙེད་གང་། །ཞེས་ཀླུ་སྒྲུབ་ལས་དངོས་སུ་མ་གསན་པར་གཅིག་ནས་གཅིག་ཏུ་བརྒྱུད་དེ་གསན་པར་བཤད་པ་སོགས་མི་འཐད་པར་འགྱུར་རོ། །རྒྱུ་མཚན་དེ་དག་གི་ཕྱིར་ན་ཟླ་གྲགས་ཀླུ་སྒྲུབ་ཀྱི་ཞབས་མ་ཟིན་པར་རྗེ་རྡོ་རྗེ་འཆང་གི་གསུང་རྒྱུན་ལས་འབྱུང་བའི་ཚུལ་གོང་དུ་བཀོད་པ་དེ་དག་དང་། ཁྱད་པར་བདག་ཉིད་ཆེན་པོ་ས་སྐྱ་པཎྜི་ཏ་ཆེན་པོ་ལ། འཆད་ཀ་ནམ་མཁའ་འབུམ་གྱིས་ཟླ་བ་གྲགས་པ་ཀླུ་སྒྲུབ་ལ་སླེབ་བམ་ཞེས་ཞུས་པའི་ལན་དུ། ཀླུ་སྒྲུབ་ཀྱི་དགོངས་པ་སྐོང་བའི་སློབ་མ་ཡིན་པས། ཀླུ་སྒྲུབ་སློབ་མ་ཟླ་གྲགས་ཡིན། །ཞེས་གསུངས་པ་ལགས་ཞེས་གསུངས་པ་ལྟར། ཟླ་གྲགས་ཀླུ་སྒྲུབ་ཀྱི་དགོངས་པ་ཕྱིན་ཅི་མ་ལོག་པར་སྐོང་བའི་སློབ་མ་ཡིན་