[A:༤༧ན]གྱི། ཞབས་ཟིན་མ་ཡིན་པའི་ཕྱོགས་འདི་འཐད་ལྡན་ཡིན་པས། སྟོན་པ་མྱ་ངན་ལས་འདས་ནས་ལོ་བཞི་བརྒྱ་ན་ཀླུ་སྒྲུབ་བྱོན། དེས་ལོ་དྲུག་བརྒྱ་བཞུགས། དགུ་བརྒྱ་ན་ཐོགས་མེད་བྱོན་ནས་དགུང་ལོ་ལྔ་བརྒྱ་བཞུགས་པའི་སྐུ་ཚེའི་སྨད་ཀྱི་སློབ་མ་དབྱིག་གཉེན་ཡིན་པར་བཤད་ཅིང་། ཟླ་བ་གྲགས་པའི་ཚེ། སློབ་དཔོན་དབྱིག་གཉེན་དང་། ཕྱོགས་གླང་དང་། གནས་བརྟན་ཆོས་སྐྱོང་སྟེ་བིརྺ་པ་རྣམས་ཀྱང་འདས་ཟིན་པར་ཟླ་བ་གྲགས་པ་ཉིད་ཀྱིས་བཤད་པའི་ཕྱིར་ཏེ། འཇུག་པ་རང་འགྲེལ་ལས། གལ་ཏེ་གནས་བརྟན་དབྱིག་གཉེན་དང་། ཕྱོགས་ཀྱི་གླང་པོ་དང་། ཆོས་སྐྱོང་ལ་སོགས་པའི་བསྟན་བཅོས་རྣམས་ཀྱི་མཛད་པ་པོ་བྱོན་ཟིན་པར་གྱུར་པ་དེ་དག་གིས་ཀྱང་ཡི་གེ་ཙམ་མཐོང་བས་འཇིགས་ཏེ། རྟེན་ཅིང་འབྲེལ་བར་འབྱུང་བའི་དོན་ཕྱིན་ཅི་མ་ལོག་པར་སྟོན་པ་འདི་ཡོངས་སུ་སྤངས་སམ་ཞེ་ན་དེ་སྐད་དུ་སྨྲའོ་ཞེས་གསུངས་པས་སོ། །འོ་ན་གསང་འདུས་སྒྲོན་གསལ་ལས། སངས་རྒྱས་ཀུན་གྱི་རིམ་གཉིས་གནས་ཀྱི་རྒྱས་བཏབ་དེ་ནི་ཀླུ་སྒྲུབ་ལས་རྙེད་པ། །ཞེས་པ་དང་། དེའི་འགྲེལ་པ་པཎྜི་ཏ་སྐལ་ལྡན་གྲགས་པས་མཛད་པ་དང་། དོ་ཧ་མཛོད་ཀྱི་ཊཱིཀ་རྣམས་ལས་དངོས་སློབ་དུ་བཤད་པ་རྣམས་ཇི་ལྟར་ཡིན་སྙམ་ན། སྒྲོན་གསལ་ལས་དེ་ལྟར་བཤད་པ་ནི་ཀླུ་སྒྲུབ་ཀྱི་མན་ངག་ལ་བརྟེན་ནས་རྙེད་ཅེས་པའི་དོན་ཡིན་ཏེ། དེ་ཡང་ཀླུ་སྒྲུབ་ཀྱི་ཞབས་ཟིན་ནས་འཆད་ཉན་མཛད་དེ་མན་ངག་དངོས་སུ་ཐོབ་པ་ནི་མ་ཡིན་གྱིས། ཀླུ་སྒྲུབ་ནས་ཨཱརྻ་དེ་ཝ་སོགས་བརྒྱུད་པ་ལས་བརྒྱུད་པ་ལས་རྙེད་ཅེས་པ་སྟེ། གཅིག་ནས་གཅིག་ཏུ་བརྒྱུད་པ་ལས་འོང་དང་བདག་གི་རྣམ་ཕྱེ་ལས་རྙེད་གང་། །ཞེས་གསུངས་པས་སོ། །སྒྲོན་གསལ་གྱི་