[A:47a]gyi/ zhabs zin ma yin pa'i phyogs 'di 'thad ldan yin pas/ ston pa mya ngan las 'das nas lo bzhi brgya na klu sgrub byon/ des lo drug brgya bzhugs/ dgu brgya na thogs med byon nas dgung lo lnga brgya bzhugs pa'i sku tshe'i smad kyi slob ma dbyig gnyen yin par bshad cing / zla ba grags pa'i tshe/ slob dpon dbyig gnyen dang / phyogs glang dang / gnas brtan chos skyong ste birWa pa rnams kyang 'das zin par zla ba grags pa nyid kyis bshad pa'i phyir te/ 'jug pa rang 'grel las/ gal te gnas brtan dbyig gnyen dang / phyogs kyi glang po dang / chos skyong la sogs pa'i bstan bcos rnams kyi mdzad pa po byon zin par gyur pa de dag gis kyang yi ge tsam mthong bas 'jigs te/ rten cing 'brel bar 'byung ba'i don phyin ci ma log par ston pa 'di yongs su spangs sam zhe na de skad du smra'o zhes gsungs pas so/ /'o na gsang 'dus sgron gsal las/ sangs rgyas kun gyi rim gnyis gnas kyi rgyas btab de ni klu sgrub las rnyed pa/ /zhes pa dang / de'i 'grel pa paNDi ta skal ldan grags pas mdzad pa dang / do ha mdzod kyi TIka rnams las dngos slob du bshad pa rnams ji ltar yin snyam na/ sgron gsal las de ltar bshad pa ni klu sgrub kyi man ngag la brten nas rnyed ces pa'i don yin te/ de yang klu sgrub kyi zhabs zin nas 'chad nyan mdzad de man ngag dngos su thob pa ni ma yin gyis/ klu sgrub nas ArYa de wa sogs brgyud pa las brgyud pa las rnyed ces pa ste/ gcig nas gcig tu brgyud pa las 'ong dang bdag gi rnam phye las rnyed gang / /zhes gsungs pas so/ /sgron gsal gyi