[A:༤༨ན] ཀླུ་སྒྲུབ། ཟླ་གྲགས། དེས་སློབ་པའི་རྡོ་རྗེ་ལ་གདམས་ཞེས་པ་ཡང་བཤད་མོད། དེ་དག་ནི་ཕྱིས་སུ་འཕགས་པས་ཞལ་བསྟན་ནས་དག་སྣང་གི་ངང་ལ་ཆོས་གསན་པས། དེའི་དབང་དུ་མཛད་ནས་བརྒྱུད་པའི་རིམ་པ་ལ་སློབ་དཔོན་གཞན་མ་སྨོས་པར་ཟླ་གྲགས་ཉིད་ཀྱིས་འཕགས་པ་ཀླུ་སྒྲུབ་ལ་དངོས་སུ་གསན་ཚུལ་སྨོས་པ་ཡིན་པས། འདི་ལ་འགལ་བ་ཅུང་ཟད་ཀྱང་ཡོད་པ་མ་ཡིན་དེ། རྗེ་བཙུན་རྣལ་འབྱོར་གྱི་དབང་ཕྱུག་བིརྺ་པས་ས་སྐྱ་པ་ཆེན་པོ་ལ་ཞལ་དངོས་སུ་བསྟན་ནས་རྒྱུད་སྡེ་བདུན་ཅུ་རྩ་གཉིས་ཀྱི་བཤད་བཀའ། ལྕགས་རིའི་ཁོང་ལས་མི་འདའ་བའི་ཟབ་ཆོས་བཞི་སོགས་སྩལ་བ་ལ་བརྟེན་ནས། གསུང་ངག་ཉེ་བརྒྱུད་ལ་བིརྺ་པ་ནས་གཞན་མི་དགོས་པར་ས་ཆེན་ཉིད་འདྲེན་པ་ནི། རང་གཞན་གྱི་གྲུབ་མཐའི་ཞལ་འཛིན་ཐམས་ཅད་རྩོད་མེད་དུ་བཞེད་པའི་ཕྱིར། དེ་ལས་གཞན་ས་ཆེན་དང་བིརྺ་པ་དུས་མཚུངས་ཡོང་བའི་གོ་སྐབས་མེད་དོ། །གལ་ཏེ་དེ་དག་མི་མཚུངས་ཏེ། ས་ཆེན་ལ་བིརྺ་པས་ཞལ་བསྟན་པའི་ལོ་རྒྱུས་གསལ་བར་ཡོད། ཟླ་གྲགས་ལ་ཀླུ་སྒྲུབ་ཀྱིས་ཞལ་བསྟན་པའི་ལོ་རྒྱུས་ཁ་གསལ་མེད་པས་སོ་སྙམ་ན། དེའི་ལོ་རྒྱུས་རྒྱས་པ་ཡི་གེའི་རིགས་སུ་བྲིས་པ་ཆེར་མེད་ཀྱང་། དོན་ལ་ཀླུ་སྒྲུབ་ཀྱིས་ཟླ་གྲགས་ལ་ཞལ་བསྟན་པ་ལ་ཐེ་ཚོམ་མི་དགོས་སྟེ། ཀླུ་སྒྲུབ་ལྟ་བུའི་བླ་མས་ཟླ་གྲགས་ལྟ་བུའི་བརྒྱུད་འཛིན་ཀྱི་སློབ་མ་ལ་ཞལ་སྟོན་པ་ཆོས་ཉིད་ཡིན་ཏེ། བརྒྱུད་ལུགས་གཞན་ལ་ཡང་དེ་ལྟ་བུའི་ཚུལ་མང་དུ་སྣང་བའི་ཕྱིར་རོ། །གཞན་ཡང་བདག་ཉིད་ཆེན་པོ་ས་སྐྱ་པཎྜི་ཏས། ཟླ་གྲགས་ཀླུ་སྒྲུབ་ཀྱི་དགོངས་པ་སྐོང་བའི་སློབ་མ་ཡིན་པར་གསུངས་ནས། ཡང་རྡོག་