[A:༤༨བ]ལུགས་ཀྱི་དབང་གི་བརྒྱུད་པ་འདྲེན་པའི་ཚེ། ཀླུ་སྒྲུབ་ཀྱིས། ཨཱརྻ་དེ་བ། ཤཱཀྱ་བཤེས་གཉེན། ཀླུའི་བྱང་ཆུབ། ཟླ་བ་གྲགས་པ་དང་བཞི་ལ་སྩལ་བར་བཤད་པས་འཐད་ལྡན་དུ་ཞལ་གྱིས་བཞེས་པས་ཀྱང་དོན་དེ་ཉིད་གྲུབ་སྟེ། ཀླུ་སྒྲུབ་ཀྱིས་ཟླ་བ་གྲགས་པ་ལ་སྩལ་ཚུལ་དེ་དག་པའི་སྣང་བ་ཙམ་གྱི་སྒོ་ནས་མ་ཡིན་པར་དངོས་སློབ་ཏུ་བྱས་ནས་གདམས་པ་སྩལ་བ་ཡིན་ན། བདག་ཉིད་ཆེན་པོ་ས་པཎ་རང་ཉིད་ཀྱིས་དགོངས་པ་སྐོང་བའི་སློབ་མར་ག་ལ་གསུངས། བརྒྱུད་རིམ་དེ་ཡང་འཐད་ལྡན་དུ་མི་བཞེད་དགོས་པའི་ཕྱིར་རོ། །དེས་ན་ཕྱིས་ཞལ་བསྟན་ནས་དག་པའི་སྣང་བས་མཇལ་བ་ལ་ནི་ངེས་པ་མེད་ལ། དེ་ལས་གཞན་དུས་ཀྱི་དབང་དུ་བྱས་ན་ཟླ་གྲགས་ཀྱིས་ཀླུ་སྒྲུབ་ཀྱི་ཞབས་ཟིན་ཡིན་པ་ལ་ལུང་རིགས་འཐད་ལྡན་མེད་པས། དེའི་དབང་གིས་ཟླ་གྲགས་ཀླུ་སྒྲུབ་ཀྱི་དངོས་སློབ་མིན་པ་འདི་དོན་ལ་གནས་སོ། །ཞེས་ཁོ་བོ་སྨྲའོ། །གལ་ཏེ་དག་པའི་སྣང་བར་མཇལ་ནས་གདམས་པ་སྩལ་བ་ཙམ་གྱི་དངོས་སློབ་ཏུ་འགྱུར་ན། མཁན་ཆེན་གཡག་པའི་མཚན་ཅན་སངས་རྒྱས་དཔལ་བདག་ཉིད་ཆེན་པོ་ས་པཎ་གྱི་དངོས་སློབ་ཏུ་ཁས་ལེན་དགོས་ཏེ། དེ་ལ་དེས་ཞལ་བསྟན་ནས་འཇམ་དབྱངས་དང་ས་པཎ་སྦགས་སྒྲུབ་ཀྱི་གདམས་པ་ཟབ་མོ་འདི་སྩལ་བའི་ཕྱིར་ཏེ། དེ་ལྟར་སྩལ་བའི་གདམས་པ་དེ་མཁན་ཆེན་དེས་དངོས་སློབ་རོང་སྟོན་ཤེས་བྱ་ཀུན་རིག་ལ་གནང་། རོང་སྟོན་ནས་བརྒྱུད་པའི་གདམས་པ་དེ་ཀུན་མཁྱེན་བསོད་ནམས་སེང་གེས་ཀྱང་གསན་ཞིང་། དུས་ཤིག་ཀུན་མཁྱེན་ཆེན་པོ་རོང་ཆུང་དུ་ཆུའི་སྟེང་དུ་ལྷུང་བའི་ཚེ་ཆུར་མ་ནུབ་པ་སོགས་ངོ་མཚར་བའི་ལོ་རྒྱུས་ཀུན་མཁྱེན་ཆེན་པོའི་རྣམ་ཐར་ན་གསལ་ཞིང་།