[A:48a] klu sgrub/ zla grags/ des slob pa'i rdo rje la gdams zhes pa yang bshad mod/ de dag ni phyis su 'phags pas zhal bstan nas dag snang gi ngang la chos gsan pas/ de'i dbang du mdzad nas brgyud pa'i rim pa la slob dpon gzhan ma smos par zla grags nyid kyis 'phags pa klu sgrub la dngos su gsan tshul smos pa yin pas/ 'di la 'gal ba cung zad kyang yod pa ma yin de/ rje btsun rnal 'byor gyi dbang phyug birWa pas sa skya pa chen po la zhal dngos su bstan nas rgyud sde bdun cu rtsa gnyis kyi bshad bka'/ lcags ri'i khong las mi 'da' ba'i zab chos bzhi sogs stsal ba la brten nas/ gsung ngag nye brgyud la birWa pa nas gzhan mi dgos par sa chen nyid 'dren pa ni/ rang gzhan gyi grub mtha'i zhal 'dzin thams cad rtsod med du bzhed pa'i phyir/ de las gzhan sa chen dang birWa pa dus mtshungs yong ba'i go skabs med do/ /gal te de dag mi mtshungs te/ sa chen la birWa pas zhal bstan pa'i lo rgyus gsal bar yod/ zla grags la klu sgrub kyis zhal bstan pa'i lo rgyus kha gsal med pas so snyam na/ de'i lo rgyus rgyas pa yi ge'i rigs su bris pa cher med kyang / don la klu sgrub kyis zla grags la zhal bstan pa la the tshom mi dgos ste/ klu sgrub lta bu'i bla mas zla grags lta bu'i brgyud 'dzin kyi slob ma la zhal ston pa chos nyid yin te/ brgyud lugs gzhan la yang de lta bu'i tshul mang du snang ba'i phyir ro/ /gzhan yang bdag nyid chen po sa skya paNDi tas/ zla grags klu sgrub kyi dgongs pa skong ba'i slob ma yin par gsungs nas/ yang rdog