[A:༤༩ན] དེ་ཡང་གདམས་པ་ཟབ་མོ་ཉམས་སུ་བཞེས་པ་ལས་བྱུང་བས་ཆོས་དེ་ཚད་ལྡན་ཡིན་པར་དེང་སང་རླུང་ལྟར་གྲགས་པའི་ཕྱིར་རོ། །མཁན་ཆེན་གཡག་པ་ཆོས་རྗེ་ས་པཎ་གྱི་དངོས་སློབ་ཏུ་འདོད་པ་ནི་ཧ་ཅང་ཐལ་ལོ། །དེ་ལྟ་བུའི་སློབ་དཔོན་ཟླ་བ་གྲགས་པས། སྔགས་ཕྱོགས་ལ་གོང་དུ་བསྟན་པ་དེ་དག་དང་མཚན་ཉིད་ཕྱོགས་ལ་མངོན་པ་མཛོད་དང་། གྲུབ་མཐའ་རྐང་གཅིག་པའི་ཕུང་པོ་ལྔའི་རབ་བྱེད་དང་། དབུ་མ་ལ་རྩ་བ་ཤེས་རབ་ཀྱི་དོན་གྱི་འགྲེལ་པ་འཇུག་པ། ཚིག་གི་འགྲེལ་པ་ཚིག་གསལ། གཞན་ཡང་བཞི་བརྒྱ་པའི་འགྲེལ་པ་དང་། རིག་པ་དྲུག་ཅུ་པའི་འགྲེལ་པ་རྣམས་མཛད་དོ། །དེ་ལྟར་འཕགས་པ་ཀླུ་སྒྲུབ་ཀྱི་སློབ་མ་ཤཱཀྱ་བཤེས་གཉེན། འཕགས་པ་ལྷ། ཀླུའི་བྱང་ཆུབ། སྒྲ་གཅན་འཛིན་དཔལ་བཤེས་གཉེན་ཏེ་བཞིའི་ནང་ནས་དང་པོ་གསུམ་དང་། ཟླ་གྲགས་དང་བཞི་ཆར་གྱིས་སློབ་པའི་རྡོ་རྗེ་ལ་གདམས་ཤིང་། འདིའི་རྣམ་ཐར་གསལ་བ་ཞིག་མ་མཐོང་ལ། དེས་རྗེས་སུ་བཟུང་ཞིང་བྱིན་གྱིས་བརླབས་པ་ནི་སློབ་དཔོན་ནག་པ་པོ་སྟེ། འདི་ལ་བུ་སྟོན་གྱི་གསང་བའི་སྒོ་འབྱེད་ལས། དེས་ནག་པོ་སྤྱོད་པ་ལ་གདམས། དེའི་རྣམ་པར་ཐར་པ་རྒྱས་པ་བདེ་མཆོག་ཏུ་ཤེས་པར་བྱ་ཞིང་ཞེས་སོགས་གསུངས་ནས་བདེ་མཆོག་པའི་ནག་པོ་སྤྱོད་པའི་རྡོ་རྗེ་ལ་བཞེད། འགོས་ལོ་ཆེན་པོས་ནག་པོ་པ་ལ་ཆེ་འབྲིང་ཆུང་གསུམ་དུ་མཛད་ནས་འདི་ཆེན་པོ་ལ་བཤད། རྗེ་རྡོ་རྗེ་འཆང་ཀུན་དགའ་བཟང་པོའི་གསུང་རྒྱུན་ཟིན་བྲིས་འགའ་ཞིག་ལས། འདི་ལ་བུས་བདེ་མཆོག་པའི་ནག་པོ་ཡིན་ཟེར་བ་མི་འཐད་དེ་དུས་མི་མཚུངས་པའི་