[A:༤༩བ]ཕྱིར་རོ། །དེས་ན་འགོས་ཀྱིས་ནག་པོ་པ་ཆེ་འབྲིང་ཆུང་གསུམ་དུ་བྱས་ནས་འདི་ཆེན་པོ་ཞེས་བཤད་ཀྱང་། འདི་ནག་པོ་སྤྱོད་ཆུང་བྱ་བ་ཡིན་ནོ་ཞེས་གསུངས་པས་ཅུང་ཟད་མི་མཐུན་པ་ཞིག་གོ །འོན་ཀྱང་དུས་མི་མཚུངས་པའི་ཕྱིར་རོ་ཞེས་པ་ངོར་པའི་ཟིན་བྲིས་ལས་བཤད་སྣང་བ། འཁོར་ལོ་བདེ་མཆོག་ནག་པོ་པའི་བརྒྱུད་རིམ་ལ་ནག་པོ་པ་ནས། ནཱ་རོ་པའི་བར་ལ། གུ་ཧྱ་པ། རྣམ་རྒྱལ་ཞབས། ཏཻ་ལོ་པ་དང་གསུམ། ལཱུ་ཧི་པའི་བརྒྱུད་པ་ལ་རྣམ་རྒྱལ་གྱི་དོད་དུ་བར་མའི་སློབ་དཔོན་བསྣན་པས་བླ་མ་གསུམ་བྱུང་བས། གསང་བ་འདུས་པའི་བརྒྱུད་རིམ་ལ་ནག་པོ་སྤྱོད་པ་ནས་ནཱ་རོ་པ་དང་དུས་མཚུངས་མངོན་ཤེས་ཅན་གྱི་བར་དུ་ས་འདྲེས་པ་ལས་མ་བྱུང་བས་དུས་མི་མཚུངས་གསུང་རྒྱུ་ཡིན་ནམ་སྙམ་པ་འཐད་པ་ལྟར་སྣང་ཡང་། འོན་ཀྱང་བདེ་མཆོག་མར་ལུགས་ཀྱི་བརྒྱུད་པ་ལ་ནག་པོ་པ་ནས། ཏཻ་ལོ་པ། ནཱ་རོ་པ། ཞེས་བར་དེར་བླ་མ་གཅིག་གིས་ཆོག་པ་ཞིག་བཤད། དེ་བཞིན་དུ་གསང་འདུས་མར་ལུགས་གྲུབ་ཐོབ་གཉིས་ཀྱི་བརྒྱུད་པ་ལ་ཡང་། ནག་པོ་སྤྱོད་པ་ནས་ཏཻ་ལོ་པ། ནཱ་རོ་པ་ཞེས་དང་། མཁས་པ་པཎྜི་ཏའི་བརྒྱུད་པ་ལ། ནག་པོ་སྤྱོད་པ་ནས། དྲི་མེད་བློ་གྲོས། དེས་དཔལ་ཡེ་ཤེས་སྙིང་པོ་ལ་གདམས། དཔལ་ཡེ་ཤེས་སྙིང་པོ་དང་ནཱ་རོ་པ་དུས་མཚུངས་པས། ནཱ་རོ་པ་དང་ནག་པོ་སྤྱོད་པ་བའི་བར་དུ་བླ་མ་གཅིག་གིས་ཆོག་པ་ཞིག་མར་ལུགས་ཀྱི་བརྒྱུད་ཡིག་རྣམས་ལས་བྱུང་ཞིང་། ཟླ་གྲགས་དང་། ནཱ་རོ་པའི་སློབ་མ་ཙནྡྲ་གོ་མི་དུས་མཚུངས་པས། ནཱ་རོ་པ་ཟླ་གྲགས་ཀྱི་ཞབས་ཟིན་ན་ཡང་། ཟླ་གྲགས་ཀྱི་