[A:༢ན]སྤེལ་ཞིང་དར་བར་མཛད་པའི་བཀའ་དྲིན་ཅན། །སྐྱེས་མཆོག་པཎ་གྲུབ་ལོ་ཙཱ་ཆེ་རྣམས་བསྔགས། །ཁྱད་པར་ཡོངས་རྫོགས་བསྟན་པའི་རྒྱལ་སྲིད་ལ། །དབང་བསྒྱུར་ཆོས་ཀྱི་རྒྱལ་པོ་ས་སྐྱ་པ། །བླ་ཆེན་ཀུན་དགའ་སྙིང་པོ་ཡབ་སྲས་དང་། །པཎ་ཆེན་ཁུ་དབོན་བརྒྱུད་པར་བཅས་ལ་འདུད། །ཐུབ་དབང་རྒྱལ་ཚབ་སྐྱེས་ཆེན་དེ་དག་གི །བཞེད་སྲོལ་མདོ་སྔགས་བསྟན་འཛིན་མཆོག་རྣམས་དང་། །ལྷག་པར་ངེས་དོན་བསྟན་པའི་སྲོག་ཤིང་ཆེ། །ཀུན་མཁྱེན་ཀུན་དགའ་བཟང་པོ་ཕྱག་གི་གནས། །ས་སྐྱའི་ཡབ་ཆོས་ཀུན་གྱི་སྙིང་པོའི་བཅུད། །འཁོར་ལོ་བདེ་མཆོག་རྒྱུད་དང་མན་ངག་གི །བསྟན་པ་བཤད་སྒྲུབ་སྒོ་ནས་འཛིན་པ་ལ། །འགྲན་བྲལ་མུས་ཆེན་སེམས་དཔའ་ཆེ་དེར་དད། །དམ་པ་དེ་ཉིད་སློབ་ཚོགས་དང་བཅས་པ། །མ་རྒྱུད་བསྟན་ལ་མཁས་པའི་གྲགས་དཀར་གྱིས། །དེང་སང་དུས་ཀྱང་ཕྱོགས་དེའི་བསྟན་འཛིན་རྣམས། །བདེ་མཆོག་བདག་པོ་ཀུན་གྱིས་བསྟོད་ཅིང་མཆོད། །གཞན་ཡང་བོད་ཡུལ་དབུས་ཀྱི་དཔལ་