[A:237]སྤྱོད་ཡུལ་དུ་མི་སླེབ་པའི་རྟེན་འབྲེལ་ཡིན་བྱས་ནས་ཡོངས། དེ་དུས་ཞག་ས་ཅིག་བྱེ་སྲུབས་སུ་བྱས་པས། དེ་ནུབ་ཇོ་ནང་པའི་སྒྲུབ་པ་པོ་འགའ་ཕོགས་ལེན་གྱི་ནས་ཁུར་ཆེས་ཆེ་བར་རེ་ཁུར་ནས་ཡོང་བ་དང་འཕྲད་པ་ཡང་ཕྱིས་རི་ཁྲོད་ཆེན་པོར་སྒྲུབ་པ་ཕོ་མོའི་སྒྲུབ་རྒྱགས་སོགས་ཀྱི་ཉེར་ལེན་བགྱིས་པ་ལ་བལྟ་བར་སྣང། དེའི་སང་བོ་གདོང་བཀྲ་ཤིས་སྒང་དུ་ཡར་རྒྱབ་ནས་ཀྱི་ཆིབས་སུ་དང་འཛོམ་བྱུང་བས། ད་ལན་གྱི་རབ་གནས་ཞལ་དྲོ་ཞིང་བྱིན་ཆགས་པ་ཡོང་ངེས་སྙམ་ངག་ཏུ་བཀྲ་ཤིས་སྒང་བརྗོད་པས། ཨ་དྲུང་རྣམ་པས་ཀྱང་བཀྲ་ཤིས་སྒང་ཞུ་ལགས་ཟེར་བས་རྟེན་འབྲེལ་ཚིག་བཀྲ་བཟང་བ་རང་བྱུང། དེའི་ནུབ་བྲག་ཤུག་ཏུ་ཉལ་ནས། སྣར་ཐང། ཚོང་འདུས། འབྲོང་རྩེ་སོགས་ནས་རིམ་གྱིས་རྒྱལ་རྩེར་མཁན་རིན་པོ་ཆེ་དང་མཇལ་ཞིང། དེ་དུས་སྦྱོང་དཀྱིལ་བཅུ་གཉིས། གཟུངས་གྲྭ་ལྔའི་དབང་ཕུལ། ཁྱད་པར་རྒྱལ་ཆེན་བཞིའི་དབང་སྐབས་ཆབ་སྲིད་བརྟན་པའི་ཁས་ལེན་ཕུལ་ལོ༎
དེ་སྐབས་སྡེ་པའི་དྲུང་དང་ཡང་མཇལ་ཙམ་བགྱིས་ནས་དཔོན་དྲུང་སྒོ་གཉིས་ཀའི་བཀའ་འབྲེལ་གསན་རྗེས། ཁ་རོའི་ལམ་ལ་བྱས་ཡར་རྒྱབ་ཏུ་ཟླ་བ་བཅུ་གཉིས་པའི་ཉེར་ལྔ་ལ་འབྱོར། ལོ་གསར་འཕྲལ་སྡེ་པ་ཡུལ་སྨད་རྣམས་དར་ལུང་དུ་ལོ་དུས་ཀྱི་སྐུ་མཚམས་ལ་ཕེབས། ངེད་དཔོན་སློབ་རྣམ་པས་རྒྱལ་ཆེན་གླིང་རང་དུ་བསྡད་ནས་སྡེ་པའི་དགོངས་ལེན་བཞིན་རྡོ་རྗེ་ཕུར་པའི་ལྷ་བསྙེན་ཞིག་བྱས། དེར་བསྙེན་པ་མཐར་ཕྱིན་སྐབས་མངའ་རིས་ནས་ཡི་གེ་གསེར་གྱི་རྟེན་བཅས་སྐྱེལ་མིར་དབོན་པོ་བློ་གྲོས་ཕུན་ཚོགས་པ་ཚོ་བྱུང་བས། ཁོང་རྣམ་པས་མར་ལམ་འགྲོག་ཕྱོགས་ལ་ཡོངས་པས་ཆོམ་པོས་འཛོམ་ལ་ཉེན་པ་རང་བྱུང་འདུག་ཀྱང་དཀོན་མཆོག་གི་སྐྱབས་