[A:287]དུས་ཀྱི་མཐར་ལྷུང་ཁྲེལ་བོར་བས༎
ཤེས་ལྡན་ཡོངས་ཀྱང་ངན་གཡོའི་ལས་མ་འཇུག༎
མ་ལུས་འགྲོ་བའི་བདེ་སྐྱིད་འཇོམས་བྱེད་པའི༎
མི་ཟད་སྡིག་པའི་ལས་སྟོབས་ཨེ་མ་མཚར༎
བློ་མིག་གསལ་ན་ལས་འབྲས་མེ་ལོང་ལྟོས༎
དཀར་ནག་མ་འདྲེས་བདེ་སྡུག་འདྲེན་མའི་གཟུགས༎
མཐོ་རིས་ངན་འགྲོའི་གནས་བཀོད་ཇི་ལྟའི་ཚུལ༎
མཐོང་ཚེ་དྲན་པའི་ངང་དེར་ཐེ་ལེ་རྒྱོབ༎
ཁ་དྲག་དཔུང་ཆེ་ང་རྒྱལ་རི་བོའི་སྤོ༎
ཆེར་རློམ་ཕལ་ཆེར་དམྱལ་བའི་དངོས་རྒྱུར་མཐོང༎
ཡུད་ཙམ་མི་རྟག་རྟག་འཛིན་འཁོར་བའི་གཤིས༎
སྨྱོན་པའི་སྣང་བློའི་དཔེ་འདྲ་ཨ་རེ་སྡུག༎
མི་རྟག་མཐོང་ཡང་མི་རྟག་མ་དྲན་པ༎
བདག་འདྲས་གདམས་ངག་བརྒྱ་ཕྲག་བསྒོམས་ཀྱང་འཆལ༎
ཚེ་འདིའི་བྱ་བས་ངེས་པར་ཡིད་སྐྱོ་བ༎
དེ་ཚེ་བདག་གིས་བསགས་པ་དོན་དང་ལྡན༎
མདོར་ན་སྲིད་དང་ཞི་ལ་མི་གནས་པའི༎
མཐའ་བྲལ་དབྱིངས་དེར་རང་སེམས་ངལ་བསོས་ནས༎
ཡང་ཡང་མར་གྱུར་དྲངས་མེད་སེམས་ཅན་ཚོགས༎
རིས་མེད་ཕན་བདེའི་དཔལ་ལ་འགོད་གྱུར་ཅིག༎
ཅེས་སྔར་བྲིས་པའི་རྣམ་ཐར་ཡང་རྒྱན་གྱི་སྤེལ་རྒྱན་དུ་བརྗོད་པའི་ཡང༎ དད་ལྡན་འགས་བསྐུལ་འདེབས་སུ་བགྱིས་པའི་ངོར་དགེ་སློང་རྣལ་འབྱོར་སྤྱོད་པ་པ༎ འཇམ་མགོན་གྲུབ་པའི་དཔའ་བོ་དཔལ་ལྡན་ཀུན་དགའ་གྲོལ་མཆོག་བློ་གསལ་རྒྱ་མཚོའི་སྡེས་ཇོ་ནང་གཟིམ་སྤྱིལ་དུ་ཡི་གེར་བཀོད་པའི་བགྱི་བ་པོ་ནི་མོས་ལྡན་སྨིན་གྲོལ་རྒྱལ་མཚན་ཞེས་བྱ་བས་བགྱིས་སོ༎ ་་༎
རྣམ་ཐར་མཚར་རྒྱན།