[A:300]དཔལ་ཁང་པ་ཡང་བཀའ་ཆོས་འགའི་ཐུགས་བཞེད་ཡོད་པས་ཅིས་ཀྱང་འགྲོ་གསུང་ནས་ལྷན་ཅིག་བྱང་ཕྱོགས་ལ་ཕེབས་ཞིང། ཇོ་མ་དར་ཇོ་ནང་གི་སྒྲུབ་པ་མོ་ཚན་ཅིག་བྱུང་བ་ལ་རྡོས་བརྡུངས་བཟློག་མཚམས། སླར་སྒྲུབ་པ་མོ་ཚན་ཆེ་བ་རང་ཅིག་གི་ཀོ་བ་མ་བཏང་བར་བསྡུས་པ་ལ། གཙང་པོ་རང་ལ་རྒལ་ནས་འཕྲད་དུ་སླེབ་བྱུང་བས་ཆོས་རྗེ་དཔལ་ཁང་པ་ཐུགས་ཧ་ལས་ཀྱི་མོས་དུངས་མཛད་ཀྱི་སྣང། དེར་ཆོས་ལུང་བྱང་རྩེར་བྱང་ནས་མེས་དབོན་རྣམས་ཀྱང་ཕེབས་པ་དང་མཇལ་མཚམས། སླར་རྩེ་ལྔར་གོང་ནས་ཀྱི་སྐུ་རིམ་ལ་དྲུག་ཅུ་པ་ཞིག་བགྱིས་གསུང་ནས་བསྒྲུབས་པས་གཏོར་བཀྲ་ལེགས་པ་རང་བྱུང་ཞིང། དགེ་སློང་རིན་ཆེན་སྒྲེས་པོ་ཡང་དེ་ན་བཞུགས་ཡོད་པས་ཁོང་གིས་ངེད་ལ་རྨི་ལྟས་བྱུང་བ་རྣམས་བཤད་དུས་བསྲུངས་མའི་འཁུ་ལྡོག་འདྲ་བའི་ཡིད་ཟ་སྐྱེ་བ་བྱུང། དེར་ངམ་རིངས་སུ་ཆོས་རྗེ་དཔལ་ཁང་པས་གཙོ་མཛད་གསུམ་པ་ཞིག་ལ་ཤིན་ཏུ་འབྱུར་བའི་ལམ་འབྲས་རྫོགས་པར་བཤད་ནས། དེའི་གཏང་རག་ལ་གཏོར་སྒྲུབ་བསྐང་གསོ་བྱས་པའི་ནུབ་སྤོས་ཀྱི་མེ་སྣ་ཕྲ་མོ་ལ་བརྟེན་པའི་གཏོར་ཁེབས་ཀྱི་རས་ཀུན་བསྲེགས་པ་ཞིག་བྱུང་བས་ཀྱང་སྔར་བཞིན་བག་ཚ་དང་བཅས་ཤར་ཕྱོགས་ལ་འོངས་པས། བྱ་རོག་གིས་རྒྱུན་གཏོར་མི་ཟ་བ་སོགས་མི་ཤིས་པའི་མཚན་མ་རང་བྱུང་ཞིང། དགེ་སློང་རིན་ཆེན་པ་ཡང་བཅུ་བདུན་མཆོད་སྟེངས་སུ་ཆོས་ལུང་བྱང་རྩེའི་ཞལ་སེར་མར་ཕྱོགས་བཅུ་དུས་གསུམ་མ་ལན་གསུམ་བཏུད་ནས་བདེན་པའི་ངང་ལ་གཤེགས་ཟེར། དེར་ངེད་པ་ནམས་པད་ཚལ་དུ་སླེབ་འཕྲལ་ཇ་དཀར་ཡོལ་དུ་བླུག་ཙམ་ལ་ཨ་དྲུང་ཚེ་བརྟན་གོང་ནས་སྙུང་ཟེར་འབོད་དུ་གནང་བྱུང་བའི་སྐད་ཆ་རྣ་བར་ཐོས་འཕྲལ་ཇ་འཐུང་