[A:104]yang rgyal ba bzang po/ dbang brtson/ 'di gnyis kyi dus phag mo gru pa dang ma mthun pas/ dpyid kyi ma mas bskyangs pa'i sos dus kyi lang tsho mngon par bdo ba na/ dgun gyi grang reg mtha' dag rang shugs kyis 'jig pa dngos po'i chos nyid du snang ba ji bzhin du/ 'jig rten gyi mes po tshangs pa'i lung gis sde bzhi'i dpal 'byor mtha' dag sde srid phag mo gru pas rang byan du mdzad pas/ de'i rjes su nam mkha' brtan pa sogs dpon chen 'ga' zhig 'dren yang dpon chen snga ma rnams ltar bod chol kha gsum la lung sgyur ba ni ma byung ngo / / de ltar dpal ldan sa skya pa'i rigs rus cho 'brang chos srid kyi ngang tshul 'di la dpags na/ g.yung po'i rigs can gyi dregs ldan mtha' dag pha wang nam 'phang spyod pa'i tshul ltar nges pas/ mi shes gdol pa'i phrug gu 'phongs pa yi/ / 'khor gyis bteg la 'jig rten 'dren pa zhes/ / smig sgyu 'bab chur sgrog pa'i grags stong sgras/ / 'jig rten yangs mor byed dang 'di mi mtshungs/ / zhes chos rje dkon cog lhun grub gsung ba yang dag pa'i gtam mo/ / smras pa/
gser ldan lto ba 'khod snyoms lus phra mchog gi bzhin ras ngos yangs par//
rigs rus nags klung stug po'i 'khri shing mig sman g.yo ba'i gar bsgyur dbus//
'khon rigs sA la'i ljon pa'i dbang po ma 'dres 'khyug pa'i zur mig can//
chos srid 'bras bu'i khur gyis dud pa'i mdzes sdug rnam 'gyur ci yang bkra//