[A:༡༠༤]ཡང་རྒྱལ་བ་བཟང་པོ། དབང་བརྩོན། འདི་གཉིས་ཀྱི་དུས་ཕག་མོ་གྲུ་པ་དང་མ་མཐུན་པས། དཔྱིད་ཀྱི་མ་མས་བསྐྱངས་པའི་སོས་དུས་ཀྱི་ལང་ཚོ་མངོན་པར་བདོ་བ་ན། དགུན་གྱི་གྲང་རེག་མཐའ་དག་རང་ཤུགས་ཀྱིས་འཇིག་པ་དངོས་པོའི་ཆོས་ཉིད་དུ་སྣང་བ་ཇི་བཞིན་དུ། འཇིག་རྟེན་གྱི་མེས་པོ་ཚངས་པའི་ལུང་གིས་སྡེ་བཞིའི་དཔལ་འབྱོར་མཐའ་དག་སྡེ་སྲིད་ཕག་མོ་གྲུ་པས་རང་བྱན་དུ་མཛད་པས། དེའི་རྗེས་སུ་ནམ་མཁའ་བརྟན་པ་སོགས་དཔོན་ཆེན་འགའ་ཞིག་འདྲེན་ཡང་དཔོན་ཆེན་སྔ་མ་རྣམས་ལྟར་བོད་ཆོལ་ཁ་གསུམ་ལ་ལུང་སྒྱུར་བ་ནི་མ་བྱུང་ངོ་། ། དེ་ལྟར་དཔལ་ལྡན་ས་སྐྱ་པའི་རིགས་རུས་ཆོ་འབྲང་ཆོས་སྲིད་ཀྱི་ངང་ཚུལ་འདི་ལ་དཔགས་ན། གཡུང་པོའི་རིགས་ཅན་གྱི་དྲེགས་ལྡན་མཐའ་དག་ཕ་ཝང་ནམ་འཕང་སྤྱོད་པའི་ཚུལ་ལྟར་ངེས་པས། མི་ཤེས་གདོལ་པའི་ཕྲུག་གུ་འཕོངས་པ་ཡི། ། འཁོར་གྱིས་བཏེག་ལ་འཇིག་རྟེན་འདྲེན་པ་ཞེས། ། སྨིག་སྒྱུ་འབབ་ཆུར་སྒྲོག་པའི་གྲགས་སྟོང་སྒྲས། ། འཇིག་རྟེན་ཡངས་མོར་བྱེད་དང་འདི་མི་མཚུངས། ། ཞེས་ཆོས་རྗེ་དཀོན་ཅོག་ལྷུན་གྲུབ་གསུང་བ་ཡང་དག་པའི་གཏམ་མོ། ། སྨྲས་པ།
གསེར་ལྡན་ལྟོ་བ་འཁོད་སྙོམས་ལུས་ཕྲ་མཆོག་གི་བཞིན་རས་ངོས་ཡངས་པར༎
རིགས་རུས་ནགས་ཀླུང་སྟུག་པོའི་འཁྲི་ཤིང་མིག་སྨན་གཡོ་བའི་གར་བསྒྱུར་དབུས༎
འཁོན་རིགས་སཱ་ལའི་ལྗོན་པའི་དབང་པོ་མ་འདྲེས་འཁྱུག་པའི་ཟུར་མིག་ཅན༎
ཆོས་སྲིད་འབྲས་བུའི་ཁུར་གྱིས་དུད་པའི་མཛེས་སྡུག་རྣམ་འགྱུར་ཅི་ཡང་བཀྲ༎