[A:119]la/ 'di dag las mched pa rus chen bco brgyad/ 'bras la dkar nag khra gsum sogs dang / bod mi'u gdung drug byung tshul shin tu mang zhing / stod kyi 'bras dkar mched dgu la/ / bal po dang bal yo bal srid gsum/ / ma stong bal stong con stong drug / mar ba dang zhang chung pu rangs dgu/ / zhes sogs dbye ba shin tu mang zhing / bse khyung 'bras kyi jo mo btsan bza' dge ldan ma'i sras/ 'bras khra bo/ de'i jo mo srun bza' khra mo la sras bzhi byung ba'i sa ches hor bza' 'bum mo khab tu bzhes pa la khyung ru dkar po/ de'i sras 'bram re shel mig de'i sras ar rje gtsug gsum/ de la gnam lha mched brgyad kyi lnga pas sras su sprul pa'i ming mang ldom stag btsan/ de'i jo mo rong bza' khye lcam la sras ma byung bas thugs ma bde bar lha yul du byon te rang gi gcen rnams la dris par/
rang re lha sras mched brgyad kyi//
khyed ni mi yi sras su sprul//
bu dang sras med thugs chad na//
zla ba bcu gsum sgrub pa mdzod//
yi dam sgoms la gsang sngags bgrongs//
lo gsar zla ba bcu gsum la//
lha ri gnyan po can du byon//
bsangs dang mchod pa gsol ba thob//
lha tshangs sras mo 'grub ste 'ong //
lha tshangs sras mo 'grub pa na//
lha yi sras la mi yi brgyud//
rigs brgyud khyad du 'phags pa 'ong //