[A:124]mkhas grub ra yig gnyis pa'i tshogs 'du ngo mtshar 'phur lding rol gar can//
gsang chen theg pa'i ze'u 'bru rab ldem dngos grub sbrang rtsi'i za ma tog/
lo rgyus myangs na zhim pa'i ro bcud skabs gsum bdag po'i bdud rtsi bzhin//
mdo khams yul gyi zla ba'i ma ma las//
lha gzigs gdung gi mngon mtho'i bsil zer can//
gangs can legs bris lam du 'phags pa'i tshe//
skal bzang skye rgu'i sa smos 'dod pa 'jo//
de yang yon chen rgyal ba skyabs la jo mo 'bro ldog bza' dang / de gu ma/ 'bri bza' ye shes mtsho dang gsum las/ dang po'i sras rje spyan snga rin po che dpon sangs rgyas bskyabs/ dpon shes rab rgyal/ gnyis pa'i sras dpon mgon po rgyal mtshan/ gsum pa'i sras rgyal ba rin po che/ bcu gnyis pa gter rgyal ba rin cen rdo rje rnams las/
rje spyan snga rin po che ni yab mes dang bka' brgyud kyi chos kyis gtso mdzad/ rgyal ba'i gsung rab rgya mtsho lta bu la thos bsam lhur blangs pas/ sgrub ris yongs kyi bstan pa'i bdag por gyur/ shar rgyal po'i lung gis mthong tshad bsad na thos tshad skrag pa'i las rngam po che gsog pa'i byed po dor rta nag po yang rdzu 'phrul gyis 'dul bar mdzad pas/ kha ba ri pa rnams la gcig tu bka' drin che/